ސަގާފީ ތަރިކަ ރައްކާތެރިކުރާ ޤައުމީ މަރުކަޒު ހުއްޓައި، ސަގާފީ ތަރިކަ ދިރާސާކުރާ ޤައުމީ މަރުކަޒުގެ ނަމުގައި ރައީސުލްޖުމްހޫރިއްޔާ އައު އިދާރާއެއް އުފެއްދެވުން، ކުރީގެ ހެރިޓޭޖް މިނިސްޓަރ ޔުމްނާ މައުމޫން އެކަމަށް ފާޑު ވިދާޅުވެއްޖެއެވެ.

ކުރީގެ މިނިސްޓަރ އޮފް އާޓްސް ކަލްޗަރ އެންޑް ހެރިޓޭޖް ޔުމްނާ މައުމޫން އެކްސްގައި ލިޔުއްވި ޕޯސްޓެއްގައި ވިދާޅުވީ، އެއް ވައްތަރެެއްގެ ތަފާތު މުއައްސަސާތައްް އުފެއްދުމަށްވުރެ ހުރި މުއައްސަސާތަކަށް ބަޖެޓާއި ވަސީލަތްތައް އިތުރުކުރުން މާ ރަނގަޅުވާނެ ކަމަށް އެކަމަނާ ދެކެވަޑައިގަންނަވާ ކަމަށެވެ.

ދިވެހި ތަރިކަ ދިރާސާކުރާ ޤައުމީ މަރުކަޒު އުފައްދަަވައި އެމަރުކަޒަށް ހަމަޖެއްސެވި މަސައްކަތްތަކަކީ، މީގެ ކުރިން ސަގާފީ ތަރިކަ ރައްކާތެރިކުރާ ޤައުމީ މަރުކަޒުގެ މަސައްކަތްތަކުގެ ތެރޭގައިވެސް ހިމެނޭ މަސައްކަތްތަކެކެވެ.

ސަރުކާރުގެ އިދާރީ އޮނިގަނޑަށް ގެންނަމުންދާ ބައެއް ބަދަލުތަކުގެ ސަބަބުން އެއް މަސައްކަތަށް އެތައް އިދާރާއެއް އުފެއްދުމަކީ، އެކަމުގެ ސަބަބުން ދައުލަތުގެ ޚަރަދު ބޮޑުވެ، ވަސީލަތްތައް ބޭކާރު ކުރެވޭނެ ކަމެއްކަމުގައި ބައެއް ސިޔާސީ ބޭފުޅުން ފާހަގަކުަރައްވައެވެ.

ސަރުކާރުގެ ތަރައްޤީގެ އެންމެ ގިނަ މަޝްރޫޢުތައް ހިންގަމުން އަންނަ ކުންފުންޏަކީ އެމްޓީސިސީ ކަމަށް ވާއިރު، އެކުންފުންޏަށް ކުރެވޭ ވަރަށް ވުރެ މަސައްކަތްތައް ގިނަ ކަމަަށް ފާހަގަކުރައްވައި، އެމްޓީސީސީން ކުރާ މަސައްކަތްތައް ކުރުމަށް، ވަޒީރުންގެ މަޖިލީހުގެ ލަފާފުޅާއިއެކު އިތުރު އެހެން ކުންފުންޏެއް އުފެއްދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ނިންމަވާފައެވެ.