ރ.އަތޮޅުގެ ތިންވަނަ އެއާޕޯޓް އެޅުމަށް ރ. ބެރިޔަންފަރު ހަމަޖައްސާފައިވާކަން ރައީސުލްޖުމްހޫރިއްޔާ އިއުލާނުކުރައްވައިފިއެވެ.

އެމަނިކުފާނު މިކަން އިޢުލާނު ކުރެއްވީ، އައްޑު ސިޓީގަން އިންޓަރނޭޝަނަލް އެއަރޕޯޓް ތަރައްޤިކުރުމުގެ މަޝްރޫޢުގެ އަމަލީ މަސައްކަތް ފެށުން ފާހަގަކުރުމުގެ ގޮތުން މިއަދު، އައްޑޫ ސިޓީ ގަމުގައި ބޭއްވި، ރަސްމިއްޔާތުގައި ވާހަކަފުޅު ދައްކަވަމުންނެވެ.

ސަރުކާރުން އެންމެ ފަހުން އިއުލާނުކުރި އެއަރޕޯޓްތަކުގެ ތެރޭގައި ރ.އަތޮޅުގައި ދެކުނު ބިތުގައި އެއަރޕޯޓެއް އެޅުމަށް ނިންމާފައި ވީނަމަވެސް އެ އެއަރޕޯޓު އަޅާނެ ތަނެއް އިޢުލާނުކޮށްފައެއް ނުވެއެވެ. ރ. އަތޮޅުގައި މިހާރު ހިންގަމުންދާ އެއަރޕޯޓަކީ އިފުރު އެއަރޕޯޓެވެ. އޭގެ އިތުރުން އަލިފުށީގައި އެއަރޕޯޓެއް އެޅުމުގެ މަސައްކަތް ހިނގަމުންދާއިރު، މިއަދު ރައީސް އިއުލާނު ކުރެއްވީ، ރ. އަތޮޅުގެ ތިންވަނަ އެއަރޕޯޓް ބެރިޔަންފަރުގައި އެޅުމަށެވެ.

ކުރީ ސަރުކާރުން ރ. އަތޮޅު ފައިނުގައި އެއަރޕޯޓެއް އެޅުމަށް ނިންމިއެވެ.އެހެން ނަމަވެސް އެކަމާއި މެދު ވަރަށް ބޮޑަށް ޚިޔާލުތަފާތުވުންތައް އުފެދިގެން ދިޔައެވެ. ބެރިޔަންފަރުގައި އެއަރޕޯޓު އަޅާނެކަން ރައީސުލްޖުމްހޫރިއްޔާ އިޢުލާނު ކުރެއްވުމުން ތިމާވެށި ރައްކާތެރި ކުރުމާއި ގުޅޭ ގޮތުން ވާހަކަދައްކާ ފަރާތްތަކުން ވަނީ އެކަމާއި ގުޅިގެން ހިތްހަމަނުޖެހުންފާޅުކޮށްފައެވެ.