ފަހި ފަތުރުވެރިކަމަށް އަންހެނުންގެ ނަމުގައި ޓޫރިޒަމް މިނިސްޓްރީން ޚާއްޞަ ޕްރޮގްރާމެއް ފަށައި އެޕްރޮގްރާމްގައި ބައިވެރިވާން ބޭނުންވާ ފަރާތްތަކަށް ފުރުޞަތު ހުޅުވާލައިފިއެވެ.

ޓޫރިޒަމް މިނިސްޓްރީން ބުނީ، އެކަމަކީ ހަފްތާ 14ގެ ތެރެއިން އެމިނިސްޓްރީން ކުރުމަށް ކަނޑައަޅާފައިވާ ކަމެއް ކަމަށެވެ. މިގޮތުން މި ޕްރޮގްރާމް އިފްތިތާޙްކޮށްދެއްވީ އެކަމަށްޓަކައި ބޭއްވި ޚާއްޞަ ރަސްމިއްޔާތުގައި މިނިސްޓަރ އޮފް އިކޮނޮމިކް ޑިވެލޮޕްމެންޓް މުހައްމަދު ސަޢީދެވެ.

ޓޫރިޒަމް މިނިސްޓްރީން ބުނީ މިއަދު އިފްތިތާޙްކުރި މިޕްރޮގްރާމްގެ ބޭނުމަކީ، ފަތުރުވެރިކަމުގެ ސިނާޢަތުގައި އަންހެނުންނަށް އަދާކުރެވޭނެ ދައުރާއި މެދު ހޭލުންތެރިކަން އިތުރުކުރުމާއިއެކު، މެންޓޯޝިޕް ޕްރޮގްރާމެއްގެ ސިފައިގައި، ފަަތުރުވެރިކަމުގެ ދާއިރާއަށް އަންހެނުން ބިނާކުރުމުގެ މަސައްކަތްތަކުގެ ތެރެއިން ފަތުރުވެރިކަމުގެ ސިނާޢަތުގައި އަންހެނުން ބާރިވެރިކޮށް، ވަޒީފާއަދާކުރާ މިންވަރު އިތުރުކުރުމަށް ފަރުމާކޮށްފައިވާ ޕްރޮގްރާމެއް ކަމަށެވެ. އަހަރަކު ދެފަހަރު ކުރިޔަށް ގެންދިޔުމަށް ރޭވިފައިވާ މިޕްރޮގްރާމް ކުރިޔަށް ގެންދިޔުމަށް ރާވާފައި ވަނީ، ތިން މަރުހަލާއަކަށް ބަހާލައިގެންނެވެ.

މިޕްރޮގްރާމްގައި ބައިވެރިވާން އެދޭ ފަރާތްތަކަށް އެކަމުގެ ފުރުޞަތު ޓޫރިޒަމް މިނިސްޓްރީން މިހާރު ވަނީ ހުޅުވާލާފައެވެ.