ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި ވޯޓުލެވޭ މީހުންގެ ރެޖިސްޓްރީ ފައިނަލް ކުރުމަށްޓަކައި، އުމުރުން 18 އަހަރު ފުރިފައިވާ ފަރާތްތަކުގެ ތެރެއިން އައިޑިކާޑުގެ މައުލޫމާތު ބަދަލުވެގެން، އަލުން އައޑީކާޑު ހައްދަން ބޭނުންވާ ފަރާތްތަކުން އަންނަ އާދީއްތަ ދުވަހުގެ ކުރިން އައިޑީކާޑް ބަދަލުކުރުމަށް ފޯމް ހުށައެޅުމަށް ޑިޕާޓްމެންޓް އޮފް ނޭޝަނަލް ރެޖިސްޓްރޭޝަނުން އެދިއްޖެއެެވެ.

އެއިދާރާއިން ބުނީ، އައިޑީކާޑުގެ މައުލޫމާތު ބަދަލުވެގެން ކާޑު އައުކުރަން ހުށައަޅާ ފަރާތްތަކުން 2024 ޖެނުއަރީ 21 ވާ އާދިއްތަ ދުވަހުގެ މެންދުރު ފަހު 15:00 ކުރިން ފޯމު ހުށައެޅުމަށް އެދޭކަމަށެވެ. އަދި އެ ސުންގަޑި ހަމަވުމަށްފަހުގައި، ކާޑު މައުލޫމާތު ބަދަލުވެގެން އަލުން ކާޑު ހައްދަން ހުށައަޅާ ފަރާތްތަކަށް އައިޑީ ކާޑު ހަދައި ދެވޭނީ، އެފަރާތަކަށް ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި ވޯޓު ނުލެވުނު ނަމަވެސް އެކަމަށް އިޢުތިރާޟު ނުކުރާކަމަށް ވާނަމަ ކަމުގައިވެސް ޑީއެންއާރުން ވަނީ ބުނެފައެވެ.

އަދި މަޖިލިސް އިންތިޚާބުގެ ފަހުން 18 އަހަރުން މަތީގެ މީހުންނަށް އައިޑީ ކާޑުގެ މައުލޫމާތު ބަދަލުވެގެން އައިޑީކާޑު ހެއްދުމުގެ ޚިދުމަތް ދެމުން ދާނެ ކަމުގައިވެސް ޑިޕާޓްމަންޓް އޮފް ނޭޝަނަލް ރެޖިސްޓްރޭޝަނުން ވަނީ ބުނެފައެވެ.