ކޮންމެ އަހަރަކުވެސް ރައްޔިތުންގެ މަޖިލިސް އައު ދައުރަށް ހުޅުވާދުވަހު، ރައީސުލްޖުމްހޫރިއްޔާ މަޖިލީހަށް ރިޔާސީ ބަޔާން ހުށައަަޅުއްވަން ޖެހޭއިރު، އެދުވަހަކީ ރަސްމީ ބަންދު ދުވަހެއްގެ ގޮތުގައި ހަމަޖައްސަވާފައި އޮތް އޮތުން، ބަދަލު ކުރައްވައި، މިއަހަރުން ފެށިގެން އެދުވަހަކީ ރަސްމީ ދުވަހެއްގެ ގޮތުގައި ރައީސުލްޖުމްހޫރިއްޔާ ހަމަޖައްސަވައިފިއެވެ.

މިއަހަރު ރައްޔިތުންގެ މަޖިލިސް ހުޅުވާ ދުވަހުގެ ގޮތުގައި މަޖިލީހުން އިއުލާނު ކުރައްވާފައި ވަނީ 5 ފެބުރުއަރީ 2024 އެވެ. އެދުވަސް ދިމާވަނީ ހަފްތާއިން ހޯމަ ދުވަހަކަށެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ، އެގޮތަށް ރައީސުލްޖުމްހޫރިއްޔާ ނިންމެވިކަން އިއުލާނުކުރައްވާފައި ވަނީ މިއަދު އެއޮފީހުން ނެރުއްވި، ދެންނެވުމުގައެވެ. މިބަދަލާއިއެކު  ރައީސުލްޖުމްހޫރިއްޔާގެ އޮފީހުން ކުރިން ނެރުއްވި ދެންނެވުން ނަންބަރު 4/2019 ބާޠިލުކުރައްވާފައިކަމުގައިވެސް ރައީސުލްޖުމްހޫރިއްޔާގެ އޮފީހުން ވަނީ ވިދާޅުވެފައެވެ.

ރިޔާސީ ބަޔާން ހުށައަޅުއްވާ ދުވަހަކީ، ރަސްމީ ބަންދު ދުވަހެއްގެ ގޮތުގައި ޒަމާނުން ސުރެ ހިނގަމުން އައި އާދަ ބަދަލު ކުރެއްވީ، ރައީސް ޔާމީނުގެ ވެރިކަމުގައެވެ. އޭގެ ފަހުން، ރައީސުލްޖުމްހޫރިއްޔާ ކަމުގެ މަޤާމަށް އިބްރާހީމް މުޙައްމަދު ޞާލިޙް ވަޑައިގެންނެވުމަށްފަހުގައި، އަލުން އެދުވަހަކީ ރަސްމީ ބަންދު ދުވަހެއް ކަމުގައި ހަމަޖެއްސެވީ، 21 ޖެނުއަރީ 2019 ގައެވެ.