އެފްރިކަން ކަޕް އޮފް ނޭޝަންސްގެ ގްރޫޕް-އެފްގައި، އެންމެ ފަހުން ބޭއްވި ވޯލްޑް ކަޕުން އެންމެން ހައިރާންކޮށްލައި ސެމީ ފައިނަލަށް ދަތުރުކުރި މޮރޮކޯއިން ތެންޒޭނިއާ 3-0 އިން ބަލިކޮށްފިއެވެ. މި ނަތީޖާއާއެކީ އެ ޓީމު އޮތީ މިހާރު ގްރޫޕްގެ އެއްވަނައިގައެވެ.

އައިވޮރީ ކޯސްޓްގެ ސްޓޭޑް ލޯރެންޓް ޕޮކޯ ސްޓޭޑިއަމްގައި ކުޅުނު މި މެޗުގައި މޮރޮކޯއިން ލީޑު ނެގީ ފުރަތަމަ ހާފުގައެވެ. އެއީ މެޗުގެ 30 ވަނަ މިނެޓުގައި ހަކީމް ޒިކެޗް ފޮނުވާލި ހިލޭ ޖެހުމެއް ތެންޒޭނިޔާ ކީޕަރު ދިފާއުކުރަން އުޅުމުގެ ތެރޭގައި ގޯލުގެ ކުރިމައްޗަށް ވެއްޓުމުން، ފުރުސަތަކަށް ބަލަބަލާހުރި ރޯމަން ސާސް ގޯލުގެ ތެރެއަށް ފޮނުވާލައިގެން ކާމިޔާބުކުރި ގޯލެކެވެ.

މުޅި މެޗުގައިވެސް އެދެވޭ ކުޅުމެއް ނުދެއްކުނު ތެންޒޭނިޔާއަށް މޮރޮކޯގެ ގޯލަށް އެންމެ ބޯޅައެއްވެސް އަމާޒުކުރެވިފައެއް ނުވެއެވެ. 

މޮރޮކޯއިން ދެވަނަ ގޯލު ކާމިޔާބުކުރީ ތެންޒޭނިޔާގެ ޑިފެންޑަރު ނޮވާޓަސް މިރޯށީއަށް މެޗުގެ 70 ވަނަ މިނެޓުގައި ދެވަނަ ރީނދޫ ކާޑަކާއެކު ރަތްކާޑެއް ދައްކައި ދަނޑުން ފޮނުވާލިފަހުންނެވެ. މިކަމުގެ ފައިދާ ފުރިހަމައަށް ނަގައި، މޮރޮކޯއިން އެ ޓީމުގެ ދެވަނަ ގޯލު ކާމިޔާބުކުރީ މެޗުގެ 77 ވަނަ މިނެޓުގައެވެ. އެއީ ތެންޒޭނިޔާގެ ގޯލުގެ ކުރިމަތީގައި ބަލާލަން ރީތި ޕާސްތަކެއް ޖަހާލުމަށްފަހު މޮރޮކޯގެ ހުނަރުވެރި މިޑްފިލްޑާ، އަޒެދީން އޯނާހީ ކާމިޔާބުކުރި މޮޅު ގޯލެކެވެ. 

އޭގެ 3 މިނެޓުފަހުން މެޗުގެ 80 ވަނަ މިނެޓުގައި މޮރޮކޯގެ 3 ވަނަ ގޯލު ކާމިޔާބުކޮށްދިނީ އަޝްރަފް ހަކީމީގެ ހުރަހަކުން އެ ޓީމުގެ އިސްކޮޅުން ދިގު ފޯވާޑް، ޔޫސުފް އެން-ނަސޭރީއެވެ. 

މި ގްރޫޕުގައި ޑީއާރު ކޮންގޯ އާއި ޒެމީބިއާ ބައްދަލުކުރި މެޗު ވަނީ 1-1 އިން އެއްވަރުވެފައެވެ.

މި ގްރޫޕުގެ މެޗުތައް ދެން އޮންނާނީ އާދީއްތަ ދުވަހުއެވެ. އެ ދުވަހު މޮރޮކޯއިން ނިކުންނާނީ ކޮންގޯއާ ދެކޮޅަށެވެ. އަދި އަނެއް މެޗުގައި ބައްދަލު ކުރާނީ ތެންޒޭނިޔާ އާއި ޒެމީބިއާއެވެ.