ރާއްޖެއިން ސީރިއާ ހަނގުރާމައަށް ދިޔަ ބައެއް އާއިލާތައް ގެންގޮސްފައި ވަނީ އެއާއިލާތަކުގެ ބައެއް މެމްބަރުންނަށް އޮޅުވާލައިގެން ކަމުގައި ހޯމް މިނިސްޓަރ ޢަލީ އިޙްސާން ވިދާޅުވެއްޖެއެވެ.

ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި، ހޯމް މިނިސްޓަރ ޢަލީ އިހްސާން ވިދާޅުވީ، ބައެއް އާއިލާތައް ސީރިއާ ހަނގުރާމައަށް ގެންދިޔުމުގައި އިސްކޮށް ހުރީ އާއިލާގެ އިސްމީހެއްގެ ބާރާއި ނުފޫޒުގައި ކަމަށެވެ. މިގޮތުން ސީރިއާ ހަނގުރާމައަށް ދިޔަ ބައެއް މީހުން، އެމީހުންގެ އަނބިދަރީން ސީރިއާއަށް ގެންގޮސްފައި ވަނީ، އަނބިދަރީންނަށް އޮޅުވާލައި ދަތުރުކުރާ ތަނެއް ނާންގައި ކަމަށެވެ. އެހެންވެ އާއިލާތައް ސީރިއާއަށް ދިޔުމަށްފަހު ހާލުގައި ޖެހުނު އިރު، ކުޑަކުދިންނާއި އަންހެނުން ހަނގުރާމައިގެ ސަރަހައްދަށް ގެންގޮސްފައި ވަނީ އެފަރާތްތަކަށް އެނގިގެން ނޫކަންވެސް ފާހަގަކުރެވިފައިވާ ކަމުގައި އިހްސާން ވިދާޅުވިއެވެ.

އިޙްސާން ވިދާޅުވީ، ހޯމަ ދުވަހު ރާއްޖެ ގެނައި އާއިލާތައް، ރިހެބިލިޓޭޓް ކުރެވޭނެ ކަމަށާއި މިހާރު އެއާއިލާތައް ތިބީ ހިއްމަފުށީގައި ކަމަށެވެ. އަދި އެއާއިލާތައް 24 ގަޑިއިރު މޮނީޓަރކޮށް ބެލެހެއްޓޭނެ ކަމުގައިވެސް އިހްސާން ވިދާޅުވިއެވެ.

ރާއްޖެއިން ސީރިއާއަށް އާއިލާތައް ގޮސްފައި ވަނީ އަވަށްޓެރި ޤައުމުތަކަށް ދަތުރު ކުރުމަށް ފަހުގައި ކަމަށާއި، އިންޑިއާއަށް ބޭސްފަރުވާއަށް ދިޔަ އާއިލާއެއްވެސް ސީރިއާއަށް ގޮސްފައިވާކަން އިޙްސާން ފާހަގަކުރިއެވެ.

ރާއްޖެއިން ސީރިއާއަށް ދިޔަ އާއިލާތަކުގެ ތެރެއިން ބައެއް މީހުން އަނބުރާ ގެނެސްފައި ވާއިރު އަދިވެސް ބޭރުގެ ޤައުމުތަކުގައި 100 އަށް ވުރެ ގިނަ މީހުން އެބަތިބި ކަމުގައިވެސް އިޙްސާން ވިދާޅުވިއެވެ.