ތާޒާ ފެނަށް އޯޑަރު ދިނުމަށް ހާއްސަ މޯބައިލް އެޕްލިކޭޝަނަކާއި ވެބްސައިޓެއް ތައާރަފު ކޮށްފިއެވެ. ރޭ ބޭއްވި ރަސްމިއްޔާތެއްގައި "ތާޒާ" އެޕްލިކޭޝަނާއި އޮފިޝަލް ވެބްސައިޓް އިފްތިތާހު ކޮށްދެއްވީ އައިލެންޑް ބެވަރޭޖަސް މޯލްޑިވްސް (އައިބީއެމް) ގެ ޗެއާމަން އަބުދުލް މަތީން މުހައްމަދު އާއި އެ ކުންފުނީގެ ޖެނެރަލް މެނޭޖަރު އަލީ އާޒިމެވެ.

އައިބީއެމް އިން ބުނީ މި ވެބްސައިޓާއި މޯބައިލް އެޕް މެދުވެރިކޮށް ކަސްޓަމަރުންނަށް ފަސޭހަކަމާ އެކު ތާޒާ ފެނަށް އޯޑަރު ކޮށްލެވޭނެ ކަމަށާއި މި ހިދުމަތުގެ ސަބަބުން ކަސްޓަމަރުންގެ އޯޑަރުތަކާއި ޑެލިވަރީގެ ހިދުމަތް ފަސޭހަ ކަމާއެކު ލިބޭނެ މަގު ފަހިވެގެންދާނެ ކަމަށެވެ.

ތާޒާ އެޕްލިކޭޝަންގައި ހިމެނޭ "ރިއަލް ޓައިމް އޯޑަރިން" ފީޗާގެ ސަބަބުން ކަސްޓަމަރުންނަށް ކޮންމެ ތަނެއްގައި ކޮންމެ ވަގުތެއްގައި ވެސް އޯޑަރުތައް ފަސޭހަކަމާއެކު ޓްރެކް ކުރެވޭނެއެވެ. އެޕްލިކޭޝަނަށް ރަޖިސްޓާކުރުމަށް ޔޫޒާ ވެރިފިކޭޝަންގެ ގޮތުގައި ބޭނުންވާނީ ހަމައެކަނި މޯބައިލް ނަންބަރެވެ.

އެޕް މެދުވެރިކޮށް އޯޑަރުތަކަށް އެއްވެސް ދަތިކަމެއް ނެތި ފައިސާ ދައްކާލެވޭއިރު ކަސްޓަމަރުން ބޭނުން ވަގުތެއްގައި ކުރިން ކޮށްފައި ހުރި އޯޑަރުތައްވެސް ބަލާލެވޭނެއެވެ.

އައިބީއެމް އަކީ މާލޭ ވޯޓާ އެންޑް ސްވަރޭޖް ކޮމްޕެނީ ޕްރައިވެޓް ލިމިޓެޑް (އެމްޑަބްލިއުއެސްސީ)ގެ ސަބްސިޑަރީ ކުންފުންޏެކެވެ. އައިބީއެމްއިން އަންނަނީ 2002 ވަނަ އަހަރުން ފެށިގެން ރާއްޖެއަށް ތާޒާ ފެން ފޯރުކޮށްދެމުންނެވެ.