އދ. ދިގުރަށުގައި ބިދޭސީ އަންހެނަކު ވިހޭ ދަރިފުޅު މަރާލާފައި އޮއްވައި ފެނުނީ އެކުއްޖާ ޑަސްބިން ތެރެއަށް އެލާލިތާ 4 ގަޑިއިރު ފަހުން ކަން ހާމަވެއްޖެއެވެ.

އެމައްސަލައިގައި ޕްރޮސެކިއުޓަރ ޖެނެރަލް އެކުއްޖާގެ މަންމަ ކަމުގައިވާ، ހިރަންޏާ ކުމުދުމާލި ޑި އަލްވިސްގެ މައްޗަށް އުފުލި ދައުވާތަކުގެ މައުލޫމާތު ހާމަކޮށް، އާއްމުކުރި ބަޔާނުގައި ބުނެފައި ވަނީ އޭނާ ވިހާފައި ވަނީ، 01 ޑިސެންބަރު 2023 ދުވަހުގެ 22:00 އާއި 03 ޑިސެންބަރު 2023 ދުވަހުގެ 05:00 އާ ދެމެދުގެ ވަގުތެއްގައި، އދ. ދިގުރަށު ގެއެއްގެ ކޮޓަރިއެއްގައި ހުންނަ ފާހާނައިގެ ތެރޭގައި ފާހާނާތަށި ތެރެއަށް ކަމަށެވެ. އަދި އޭނާ ފާހާނާތަށި ތެރެއިން ކުއްޖާ ނަގައި, ކޮތަޅުތަކަކަށް ލައިގެން ގެންގޮސް، 03 ޑިސެންބަރު 2023 ދުވަހުގެ 05:31 އެހައިކަށްހައިއިރު، އދ.ދިގުރަށް ފަރީދީ މަގަށްވާގޮތަށް ހަދާފައި ހުންނަ ފަން ކޮށިގަނޑުގެ ބޭރުގައި ހުރި ކުނިވާ ބާވަތުގެ ކުނި އެޅުމަށް ހާއްސަ ކޮށްފައިވާ ފެހި ޑަސްބިނަށް ކުއްޖާގެ ހަށިގަނޑު އެއްލާލިކަމަށްވެސް ޕްރޮަސެކިއުޓަރ ޖެނެރަލްގެ އޮފީހުން އާއްމުކުރި ބަޔާނުގައި ބުނެފައި ވެއެވެ. ކުއްޖާގެ ހަށިގަނޑު ފެނިފައި އޭގެ ހަތަރު ގަޑިއިރު ފަހުން، އެދުވަހުގެ ހެނދުނު 9:28 ހާއިރުގައެވެ.

އެމައްސަލަ އާއި ގުޅިގެން ތުއްތު ކުއްޖާގެ ހަށިގަނޑު ވަނީ އިންޑިއާއަށް ފޮނުވައި ޕޯސްޓް މޯޓަމްވެސް ހަދާފައެވެ.

މިމައްސަލައިގެ ތުހުމަތުގައި ހައްޔަރުކޮށްފައިވާ، ސްރީލަންކާ ރައްޔިތެއްކަމަށްވާ ހިރަންޏާ ކުމުދުމާލި ޑި އަލްވިސް މިހާރު ހުރީ ޝަރީއަތް ނިމެންދެން ބަންދުކޮށްފައެވެ.