އދ. ދިގުރަށުގެ ކުނި ގޮނޑުން މަރުވެފައި އޮތް ކުއްޖަކު ފެނުނު މައްސަލައިގައި ހައްޔަރުކުރި ސްރީލަންކާގެ އަންހެން މީހާގެ މައްޗަށް ތިން ދައުވާއެއް އުފުލައިފިއެވެ.

ޕްރޮސެކިއުޓަރ ޖެނެރަލްގެ އޮފީހުން ވިދާޅުވީ، އެމައްސަލައިގައި ދައުލަތުން ދައުވާ އުފުލާފައި ވަނީ، ސްރީލަންކާގެ ރައްޔިތެއްކަމަށްވާ ހިރަންޏާ ކުމުދުމާލި ޑި އަލްވިސްގެ މައްޗަށެވެ. އެގޮތުން އޭނާގެ މައްޗަށް އުފުލާފައިވާ ދައުވާތަކުގެ ތެރޭގައި ހިމެނެނީ، އެނގިހުރެ މީހަކު މެރުމުގެ ކުށުގެ ދަޢުވާ އާއި، ކުޑަކުއްޖަކަށް ރައްކާތެރިކަން ފޯރުކޮށްދިނުމުގެ ޒިންމާ އޮތް ފަރާތެއް ކަމުގައިވެ ހުރެ، އެ ކުއްޖާގެ ޞިއްޙަތަށް އުނިކަން އަތުވެދާނެ ފަދަ ޢަމަލެއް ޤަޞްދުގައި ހިންގުމުގެ ކުށުގެ ދަޢުވާ އާއި، އެނގިހުރެ މަރެއް ފޮރުވުމުގެ ކުށުގެ ދަޢުވާކަމަށެވެ.

މިތިން ދައުވާގެ ތެރެއިން ފުރަތަމަ ދައުވާގެ އެންމެ ކުޑަ އަދަބަކީވެސް 10 އަހަރަށް ޖަލަށް ލުމެވެ. އަދި ދެވަނަ ދައުވާގެ އަދަބަކީ 3 އަހަރަށް ޖަލަށް ލުމެވެ. އަދި ވަނަ ދައުވާގެ އަދަބަކީ، 9 މަހާއި 18 ދުވަހަށް ޖަލަށް ލުމެވެ.