ތުރުކީވިލާތުގެ ރައީސް ރަޖަބް ތައްޔިބް އުރުދުޣާން ރިޔާސީ 3 ވަނަ ދައުރަކަށް ހުވާކުރުމަށް ބޭއްވި ރަސްމިއްޔާތުގައި ރައީސުލްޖުމްހޫރިއްޔާގެ ނައިބު ފައިޞަލް ނަސީމް ބައިވެރިވެވަޑައިގެންފިއެވެ.

ރައީސް އުރުދުޣާން ހުވާކުރެއްވުމަށް ބޭއްވި ރަސްމިއްޔާތު އޮތީ، މިރޭ އަންކާރާގައި ހުންނަ ޕްރެސިޑެންޝަލް ކޮމްޕްލެކްސްގައެވެ. މިރަސްމިއްޔާތުގައި ރައީސުލްޖުމްހޫރިއްޔާގެ ނައިބު ބައިވެރިވެވަޑައިގެންނެވީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ޚާއްސަ މަންދޫބެއްގެ ހައިޘިއްޔަތުން ކަމުގައި، ރައީސުލްޖުމްހޫރިއްޔާގެ އޮފީހުން ވިދާޅުވެފައިވެއެވެ.

ތުރުކީވިލާތުގެ ރައީސް އުރުދުޣާން 3 ވަނަ ދައުރަކަށް ހުވާކުރުމަށް ބޭއްވި ރަސްމިއްޔާތަށް ވަޑައިގެންނެވި ޤައުމުތަކުގެ ލީޑަރުންނަށާއި، ސަރުކާރުތަކުގެ އިސްވެރިންނަށް އެމަނިކުފާނު ދެއްވި، ރޭގަނޑުގެ ފަރިއްކޮޅެއްގައިވެސް ރައީސުލްޖުމްހޫރިއްޔާގެ ނައިބު ބައިވެރިވެވަޑައިގެންނެވިއެވެ.

ރައީސް އުރުދުޣާން ރިޔާސީ 3 ވަނަ ދައުރެއް ކާމިޔާބު ކުރެއްވި، 28 މޭގައި އޮތް ރިޔާސީ އިންތިޚާބުގެ ދެވަނަ ބުރު ކާމިޔާބު ކުރައްވައިގެންނެވެ. 

ދިވެހިރާއްޖެއިން ތުރުކީވިލާތާއި އެކު ސިޔާސީ ގުޅުން ޤާއިމްކޮށްފައި ވަނީ، 28 މޭ 1979ގައެވެ.