ހއ. ދިއްދޫ ފެނަކަ އިންޖީނުގެ އިމާރާތްކުރުމުގެ މަސައްކަތަށް ނަގާފައިވާ 57 މުވައްޒަފުންގެ ކޮންޓްރެކްޓް އާނުކުރި މައްސަލަ ރައްޔިތުންގެ މަޖިިލީހަށް ވައްދައިފިއެވެ.

އެމައްސަލަ މަޖިލީހަށް ހުށައެޅުއްވީ، ރައްޔިތުންގެ މަޖިލީހުގެ ދިއްދޫ ދާއިރާގެ މެމްބަރު ޢަބުދުﷲ ވަހީދެވެ. މަޖިލީހުގެ ރައީސް މުޙައްމަދު އަސްލަމަށް އެޑްރެސްކުރައްވާ ޢަބުދުﷲ ވަހީދު ފޮނުއްވި ސިޓީފުޅުގައި ވަނީ، ދިއްދޫ އިންޖީނުގެ އިމާރާތްކުރުމުގެ މަސައްކަތަށް ނަގާފައިވާ ކޮންޓްރެކްޓް މުވައްޒަފުންގެ ވަޒީފާގެ ކޮންޓްރެކްޓް އައު ނުކުރުމަށް ފެނަކަ ކޯޕަރޭޝަނުން ނިންމާފައި ވަނީ، އެފަރާތްތަކަށް ނޯޓިހެއް ދިނުމަކާއި ނުލައި ކަމަށެވެ. އަދި އެކަމުގެ ސަބަބުން އެ މުވައްޒަފުންނާއި މުވައްޒަފުންގެ އާއިލާތައް ތިބީ ވަރަށް ބޮޑު ނުތަނަވަސްކަމެއްގައިކަން ޢަބުދުﷲ ވަހީދު ފާހަގަކުރައްވާފައިވެއެވެ.

އަބުދުﷲ ވަޙީދު ހުށައަޅުއްވާފައި ވަނި، ދިއްދޫ އައު އިންޖީީނުގެ މަސައްކަތް ނިމެންދެން މުވައްޒަފުން ވަޒީފާގައި ބޭތިއްބުމަށް ފެނަކަ ކޯޕަރޭޝަން އަށް ދެންނެވުމަށެވެ. އަދި މަޖިލީހުގެ ކަމާބެހޭ ކޮމިޓީއަކަށް އެމައްސަލަ ފޮނުއްވައި ދެއްވުމަށްވެސް ދިއްދޫ ދާއިރާގެ މެމްބަރު ޢަބުދުﷲ ވަހީދު ވަނީ ހުށައަޅުއްވާފައެވެ.

ދިއްދޫ ފެނަކަ އިންޖީނުގެ އިމާރާތްކުރުމަށް ނަގާފައިވާ ކޮންޓްރެކްޓް ސްޓާފުންގެ ކޮންޓްރެކްޓްގެ މުައްދަތު ހަމަވުމުން އެ މުވައްޒަފުން ފެނަކައިން ދޫކޮށްލީ، އެ އިމާރާތުގެ މަސައްކަތް ހުއްޓިފައިވާތާ ގިނަ ދުވަސްތަކެއް ވުމުންނެވެ. އަދި ފެނަކައަށް ދިމާވެފައިވާ މާލީ ދަތިތަކަށް ހައްލު ހޯދުމުގެ ގޮތުން، މަސައްކަތެއް ނެތި ތިބި ކޮންޓްރެކްޓް މުވައްޒަފުންގެ ވަޒީފާގެ ކޮންޓްރެކްޓް އައު ނުކުރަށްވެސް އެކުންފުނިން ވަނީ ނިންމާފައެވެ.

ފެނަކައިން ހާމަކޮށްފައިވާ ގޮތުގައި، މާކެޓްގެ އަގުން 23 މިލިއަން ރުފިޔާއަށް އެޅޭ އެ އިމާރާތަށް މިހާރުވެސް ފެނަކައިން ވަނީ 49 މިލިޔަން ރުފިޔާ ޚަރަދުކޮށްފައެވެ.