ސީރިއާއަށް ހަނގުރާމައަށް ދިޔަ އާއިލާތަކުގެ 21 މީހަކު މިއަދު ރާއްޖެ ގެނެސްފިއެވެ.

ހޯމް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި، ހޯމް މިނިސްޓަރ ޢަލީ އިޙްސާން ވިދާޅުވީ، މިއަދު މާލެ ގެނެސްފައި ވަނީ، ސީރިއާއަށް ހަނގުރާމައަށް ދިޔަ އާއިލާތަކަށް ނިސްބަތްވާ މީހުންނާއި ސީރިއާ ހަނގުރާމައިގެ ތެރޭގައި އުފަންވި ކުޑަކުދިންގެ ތެރެއިން 18 އަހަރު ނުވާ 14 ކުޑަކުދިންނާއި ބޮޑެތި 7 މީހުން ކަމަށެވެ. މިގޮތުން ޖުމުލަ 21 މީހުން މިއަދު ރާއްޖެ ގެނައި އިރު، އަދިވެސް ރާއްޖެ އަންނަން ބޭނުންވާ، 90 މީހުން ރެފިއުޖީ ކޭމްޕްތަކުގައި އެބަތިބިކަމަށް، އިޙްސާން ވިދާޅުވިއެވެ.

އިހްސާން ވިދާޅުވީ، ބޭރު ޤައުމުތަކުަގައި ހަނގުރާމަތައް ހިނގާ ސަރަހައްދުތަކުގައި 100 ވުރެ ގިނަ ދިވެހިން އެބަތިބި ކަމަށެވެ.

އިހްސާން ވިދާޅުވީ، މިއަދު ރާއްޖެ ގެނައި މީހުންގެ ތެރޭގައި ހިމެނެނީ 5 އާއިލާއަަކަށް ނިސްބަތްވާ 21 މީހުން ކަމަށާއި އޭގެ ތެރޭގައި 15 ކުޑަކުދިންނާއި 5 އަންހެނުންނާއި، 1 ފިރިހެނަކު ހިމެނޭ ކަމަށެވެ. އަދި ރާއްޖެ ގެނައި ހުރިހާ ކުޑަކުދިންނަކީވެސް އެ ފަސް އަންހެނުންގެ ދަރީން ކަމުގައި ސާބިތު ކުރެވިފައި ކަމުގައިވެސް އިޙްސާން ވިދާޅުވިއެވެ.

އިޙްސާން ވިދާޅުވީ، މިއަދު ރާއްޖެ ގެނައި މީހުން ރާއްޖެ ގެނެސްފައި ވަނީ ސަރުކާރުން ޗާޓަރުކުރި ފްލައިޓެއްގައި ތުރުކީގެ ގާޒީއަންތެޕްއިން މާލެއަށެވެ. އެމީހުން ގެނައި ފްލައިޓް ވެލާނާ އިންޓަރނޭޝަނަލް އެއާޕޯޓަށް ޖައްސާފައި ވަނީ، ރޭ ފަތިހު 5:02 ގައެވެ.

މާލެ ގެނައި މީހުންގެ މެޑިކަލް އެސެސްމެންޓް ހެދުމަށް ފަހު މިހާރުވަނީ، ހިންމަފުށީގައި ހުންނަ ނޭޝަނަލް ރީއެންޓްރިގްެރޭޝަން ސެންޓަރަށް ގެންގޮސްފައެވެ.