މިއަހަރުގެ ޖެނުއަރީ މަހުގެ މިހާތަނަށް 19 މީހަކު އިންފުލުއެންޒާއަށް ޕޮޒިޓިވްވެފައިވާ ކަމުގައި އެޗްޕީއޭއިން ބުނެފިއެވެ.

އެޗްޕީއޭއިން ހާމަކޮށްފައިވާ ތަފާސް ހިސާބުގައި ވާގޮތުން، މިހިނގާ ޖެނުއަރީމަހު އިންފުލުއެންޒާ އޭއަށް 18 މީހަކު ޕޮޒިޓިވްވި އިރު އިންފުލުއެންޒާ ބީއަށް އެކަކު ވަނީ ޕޮޒިޓިވްވެފައެވެ.

އަދި ހުސްވި އަހަރުގެ ފަހު ހަތަރުމަސްދުވަހުގައި، ސެޕްޓެމްބަރު މަހު 41 މީހުން، އޮކްޓޫބަރު މަހު 46 މީހުން، އަދި ނޮވެމްބަރު މަހާއި ޑިސެމްބަރު މަހު ކޮންމެ މަހަކު 24 މީހުން ޕޮޒިޓިވްވެފައިވެއެވެ.

އެޗްޕީއޭއިން ބުނީ، 2023 ވަނަ އަހަރުގެ ނޮވެމްބަރު އަދި ޑިސެމްބަރު މަހާ އަޅާ ބަލާއިރު، 2024 ވަނަ އަހަރުގެ މިހާތަނަށް އިންފްލުއެންޒާ ޕޮސިޓިވްވާ މިންވަރު އިތުރުވެފައިވާކަން ފާހަގަ ކުރެވޭ ކަމަށެވެ.

އެޗްޕީއޭއިން ބުނީ، އިންފްލުއެންޒާ އަދި ކޮވިޑް-19 އިން ރައްކާތެރިވުމަށްޓަކައި އެންމެ މުހިންމު ކަމަކީ، ވެކްސިންޖެހުންކަމަށެވެ. މިގޮތުން ޚާއްސަކޮށް ކުޑަކުދިންނާއި، އުމުރުން ދުވަސްވީ މީހުން އަދި ދިގު މުއްދަތަށް ފަރުވާ ކުރަންޖެހޭ ބަލިތައް ހުންނަ ފަރާތްތަކުން ވެކްސިން ޖެހުމުން ބަލީގައި ބޮޑުވަރުވުމުން ރައްކާތެރިކޮށްދޭކަމުގައި އެޗްޕީއޭއިން ވަނީ ބުނެފައެވެ.

އިންފުލުއެންޒާ ޖެހިގެން ދާދިފަހުން ޒުވާން ފިރިހެނަކު ނިޔާވި އިރު، މިހާރުވެސް އިންފުލުއެންޒާ ޖެހިގެން 3 ޒުވާނަކަށް ވެންޓިލޭޓަރުގައި ބާއްވައިގެން ފަރުވާދެމުންދާ ކަމުގައި، ނޭވާލާ ނިޒާމަށް ޖެހޭ ބަލިތަކުގެ ޚާއްޞަ ޑޮކްޓަރު ޑރ. މުޙައްމަދު ޢަލީ ހާމަކުރައްވާފައިވެއެވެ.