އިރުވައި މޫސުމާއި އެކު ކޮންމެ އަހަރަކުވެސް ވައި ނުސާފުވުުގެ މައްސަލަ ކުރިމަތިވާއިރު، މިއަދު ދުރު ފެންނަ މިންވަރު 5 ކިލޯމީޓަރަށް ދަށްވެއްޖެ ކަމުގައި މޫސުމާއި ބެހޭ ޤައުމީ އިދާރާއިން ވިދާޅުވެއްޖެއެވެ.

މޫސުމާއި ބެހޭ ޤައުމީ އިދާރާއިން ވިދާޅުވީ، އާއްމު ދުވަހެއްގައި ހަމަލޮލަށް 10 ކިލޯމީޓަރަށްވުރެ ދުރު ފެންނާނެ ކަމަށެވެ. އެހެން ނަމަވެސް މިފާއިތުވެ ދިޔަ ސައުވީސް ގަޑިއިރުގެ ތެރޭގައި ދުރުފެންނަ މިންވަރު، 5 ކިލޯމީޓަރަށް ދަށްވެފައިވާ ކަމަށެވެ.

މޫސުމާއިބެހޭ ޤައުމީ އިދާރާއިން ވިދާޅުވީ، ރާއްޖޭގެ ސަރައްހަދުގައި ވައި ނުސާފުވެފައި ވަނީ، އިރު އުތުރުން ޖެހޭ ބާރުވައިގެ ސަބަބުން ކަމަށެވެ. މިގޮތުން އުތުރު އިންޑިއާ އާއި އިންޑިއާ އިރުމަތީ އައްސޭރިފަށުގެ ސަރަހައްދުތަކުގައި ވައި ވަނީ ވަރަށް ބޮޑަށް ނުސާފުވެފައެވެ.

ހިމާލިޔާ ފަރުބަދަ ތަކުގެ ދެކުނުން އިންޑިއާގެ އުތުރުގެ ސަރަހައްދުތަކުގައި އުފެދޭ ހިރަފުހާއި ދުން ދަނީ، ބާރުވަޔާއި އެކު ދެކުނުގެ ސަރަހައްދުތަކަށް ފެތުރެމުންނެވެ. 

އިއްޔެއާ މިއަދު އިންޑިއާގެ ވެރިރަށް ދިއްލީގައި ނުރައްކާތެރި ދަރަޖައަކަށް ވަނީ ވައި ނުސާފުވެފައެވެ. މިގޮތުން ވައި ނުސާފު މިންވަރު އިއްޔެ ދިއްލީގައި ހުރީ، 458 ގައެވެ.