އައްޑޫ ސިޓީގެ ބިންހިއްކުމުގެ މަޝްރޫއު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ފައްޓަވައިދެއްވައިފިއެވެ.

މިރަސްމިއްޔާތު އޮތީ މިއަދު، މިއަދު ހަވީރު އައްޑޫސިޓީގެ މަރަދޫއާ ހަންކެޑަ ގުޅޭ ސަރަޙައްދުގައެވެ.

މިރަސްމިއްޔާތުގައި އައްޑޫ ސިޓީކައުންސިލްގެ މެމްބަރުންނާއި، ދައުލަތުގެ ވަޒީރުންނާއި، އައްޑޫގެ އާއްމު ރައްޔިތުން ބައިވެރިވިއެވެ.

މިރަސްމިއްޔާތުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި ވިދާޅުވީ، މިއަދަކީ، ތަރައްޤީގެ ހެޔޮ ފާހަގަ ފެށޭ، އައްޑޫ ސިޓީގެ މި ބިމަށް ތަރައްޤީގެ ހެޔޮ ބަދަލު ޢަމަލީގޮތުން އައުމުގެ ދުވަސްކަމަށެވެ. 

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ވިދާޅުވީ، އެދުވަހު އޮތީ، މިއަދު މި ދެކޭ މަންޒަރާއި އަދި މާދަމާގެ ކުރިއެރުމާއި ތަރައްޤީގެ މޭވާއަކީ ފޮނި އެއްޗަކަށް ވުމަށް ދިވެހިން ކުރި އުންމީދުކަމަށެވެ. އެ އުންމީދަކީ އޭގެ ރަހައެއް، ވަހެއް، ކުލައެއް ނުލިބި، ތާއަބަދަށް ކުރާ ހަނގުރާމައަކަށް ވުމަށް އެއްވެސް ރައްޔިތަކު، އެއްވެސްއިރަކު ނޭދޭކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. އެމަނިކުފާނު ވިދާޅުވީ، ދައްޗާއި ތުރާލާއި، އުނދަގުލާއި ބުރަ ތަހައްމަލް ކުރަނީ، އޭގެ ފަހަތުން ލިބޭނެ ހަމަޖެހުމާއި ފަސޭހައިގެ އެދުމުގައިކަމަށާއި އެ ދުވަހު ރައްޔިތުން އުފުލި ތަކުލީފުގެ އެ މަރުޙަލާ މިހާރު ނިމިއްެޖެ ކަމަށެވެ.

އައްޑޫސިޓީގައި 228 ހެކްޓަރު ބިން ހިއްކުމަށް ސަރުކާރުން ވަނީ ނިންމާފައެވެ. އެގޮތުން ހިތަދޫއަށް 90 ހެކްޓަރާއި، މަރަދޫ ފޭދޫއަށް 76 ހެކްޓަރުގެ ބިން އިތުރުކުރުމާއިއެކު، ލިންކް ރޯޑު ތަރައްޤީ ކުރުމަށް 3.3 ހެކްޓަރުގެ ބިމާއި، 8.3 ހެކްޓަރު އިތުރުކޮށް، ބިންހިއްކައިގެން ފަތުރުވެރިކަމަށް 3 ރަށެއް ހެދުންވެސް ހިމެނެއެވެ.