ސަރުކާރު ހިންގާ ޕީޕީއެމް ޕީއެންސީގެ ފަރާތުން، 20 ވަނަ ރައްޔިތުންގެ މަޖިލީހުގެ އިންތިޚާބުގައި ވާދަކުރުމަށް ޓިކެޓް ދިނުމަށް ބާއްވާ ޕްރައިމަރީގެ ވޯޓު ނެގުން އަނެއްކާވެސް ފަސްކޮށްފިއެވެ.

އެކޯލިޝަނުން އެންމެ ފަހުން ޕްރައިމަރީ ބޭއްވުމަށް ނިންމީ، މިހިނގާ ޖެނުއަރީ މަހުގެ 20 ވަނަ ދުވަހުގައެވެ. އެހެން ނަމަވެސް މިހާރު އެތާރީޚު ވަނީ ޖެނުއަރީ 27އަށް ބަދަލުކޮށްފައެވެ.

ޕީއެންސީގެ އިސްބޭފުޅަކު ވިދާޅުވީ، ޖެނުއަރީ 27 ވަނަ ދުވަހުގައި އިންތިޚާބު ބާއްވާގޮތަށް ފަސްކުރީ، ޕްރައިމަރީ ބޭއްވުމަށް ކުރަންޖެހޭ މަސައްކަތްތައް އިތުރަށް ފުރިހަމަކުރުަމަށް ވަގުތު ހޯދުމަށްޓަކައި ކަމަށެވެ.

ޕީޕީއެމް-ޕީއެންސީ ކޯލިޝަނުން ރައްޔިތުންގެ މަޖިލީހުގެ ހުރިހާ ދާއިރާއަކަށް ކެންޑިޑޭޓުން ނެރޭނެ ކަމުގައި އެޕާޓިން ބުނެފައިވެއެވެ. އަދި މިހާތަނަށް 10 ދާއިރާއެއްގެ ކެންޑިޑޭޓުންނަށް ވަނީ ޕްރައިމަރީއަކާއި ނުލައި ޓިކެޓްދިނުމަށް ނިންމާފައެވެ. 

ޕީއެންސީން ހާމަކޮށްފައިވާ ގޮތުގައި އެޕާޓީގެ މަޖިލިސް ޕްރައިމަރީގައި ވާދަކުތުރުމުގެ ޝައުޤުވެރިކަން 354 ފަރާތަކުން ވަނީ ފާޅުކޮށްފައެވެ.