Advertisement
ޓެންޒޭނިއާގެ ސިމިޔޫ ސަރަހައްދުގެ ބާރިއަދި ޑިސްޓްރިކްޓްގެ މައިނެއް ---
ޓެންޒޭނިއާގައި މައިނެއްގައި ހިނގި ބިންގަނޑު ކަނޑައިގެން ދިޔުމުގެ ހާދިސާއެއްގައި 22 މީހުން މަރުވެއްޖެ
އެފްރިކާގެ ޤައުމެއް ކަމުގައިވާ ޓެންޒޭނިއާގެ މައިނެއްގެ ތެރޭގައި ހިނގި ބިންގަނޑު ކަނޑައިގެން ދިޔުމުގެ ހާދިސާގައި 22 މީހުން މަރުވެއްޖެއެވެ.
މިހާދިސާ ހިނގާފައި ވަނީ ޓެންޒޭނިއާގެ ސިމިޔޫ ސަރަހައްދުގެ ބާރިއަދި ޑިސްޓްރިކްޓްގައި ހުންނަ ނަގަލިތާ މައިންގައެވެ. މިހާދިސާގައި މަރުވި އެންމެންނަކީވެސް ފިރިހެނުންނެވެ. އަދި ބިންގަނޑު ކަނޑައިގެން ދިޔުމުގެ ސަބަބުން ފަސްގަނޑު ދަށުވި މީހުންގެ ހަށިތައް މިހާރުވަނީ ނަގާފައެވެ.
ހާދިސާ އާއި ގުޅިގެން ޓެންޒޭނިއާގެ ރައީސާ ސާމިޔާ ސުހުލު ހަސަން ހާދިސާގައި މަރުވި މީހުންގެ އާއިލާތަކަށް ތައުޒިޔާ ފޮނުއްވާފައެވެ.
ޓެންޒޭނިއާގެ ރައީސާ ސާމިޔާ އެކްސްގައި ކުރެއްވި ޕޯސްޓުގައި ވިދާޅުވީ، މަރުވި އަޚުންނަކީ، ކުދި ކުދި މައިންތަކުގައި މަސައްކަތްކޮށް، އެމީހުންނާއި އެމީހުންގެ އާއިލާއަށް ބޭނުންވާ ކަންކަން ފުއްދައިދީ، ޤައުމީ ތަރައްޤީގައިވެސް ހިއްސާވާ ބައެއް ކަަމަށެވެ.
ޓެންޒޭނިއާ ސަރުކާރުން ހާމަކޮށްފައިވާ ގޮތުގައި އެޤައުމުގެ އުތުރު ސަރަހައްދުގައި ހިންގަމުން އައި އެމައިނަކީ މާފުޅާކޮށް މައިންކުރުމުގެ މަސައްކަތް ހިންގާ ވިޔަފާރިއެއްގެ ތަނެއް ނޫންކަމުގައި ޓެންޒޭނިއާގެ ސަރުކާރުން ބުނެފައިވެއެވެ. ޓެންޒޭނިއާގެ އުތުރުގައި ހިންގާ މައިން ކުރުމުގެ މަސައްކަތްތައް ހިނގަނީ އެކަށީގެންވާ ވަރަށް ސަލާމަތީ ފިޔަވަޅުތަކާއި ބެލެހެއްޓުންތަކާއި އެކުގައި ކަމަށް ނުވާތީ، މިފަދަ ހާދިސާތައް ހިނގުން އިތުރުވެފައި ވެއެވެ.
