ޢީދުގެ ޙަޤީޤީ އުފަލެއްކަމުގައި ކޮންމެ މީހަކުވެސް ހަދަންވީ، އެމީހެއްގެ މައިންބަފައިންނާއި އަނބިދަރިންނާއި ގާތްތިމާގެ މީހުންނާ އެކުގައި އުފާވެރި ވަގުތުކޮޅެއް ހޭދަކޮށް، އެކަކު އަނެކަކާ ސަލާންކޮށް، ހިތުގެ ޚާލިޞްކަމާއި ހިތްހެޔޮކަން ފާޅުކުރުމަށް ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ،  ބަރަކާތްތެރި ފިޠުރު ޢީދުގެ މުނާސަބަތުގައި ދިވެހި އެންމެހާ ރައްޔިތުންނަށް ފޮނުއްވި ތަހުނިޔާގެ ޚިޠާބުގައެވެ.

ރައީސުލްޖުމްހޫރިއްޔާގެ ޚިޠާބުގައި ވިދާޅުވީ، މިއަދު އަޅުގަނޑުމެން މި ފާހަގަކުރާ އުފާވެރި ޢީދަކީ، ރޯދައިގެ އަޅުކަމުން ލިބިދިން ފިލާވަޅުތަކާއި އިޙްސާސްތަކާއި ތަޖުރިބާތަކުގެ ބޭނުން ހިފުމަށް، ވަރަށް އެކަށީގެންވާ ދުވަހެއް ކަމަށެވެ. އެކަމުގައި ވެސް އަޅުގަނޑުމެން އިސްކުރަންވީ މައިންބަފައިންނާއި ދަރިންނާއި ގާތްތިމާގެ މީހުންނާއި، އެއަށް ފަހުގައި އެކުވެރިންނާއި ރަޙްމަތްތެރިންކަމުގައި ރައީސުލްޖުމްހޫރިއްޔާ ވިދާޅުވިއެވެ.

އެމަނިކުފާނުގެ ޚިޠާބުގައި އިތުރަށް ވިދާޅުވީ، މިޢީދުގައި، ވަކިން ޚާއްޞަ ސަމާލުކަމެއް ދޭންވީ، އެއްވެސް ސަބަބަކާ ހުރެ، މީހަކާ މެދު ހިތުގައި ރުޅިވެރިކަމެއް ނުވަތަ ދެކޮޅުވެރިކަމެއް އަދި ހިތްހަމަނުޖެހުމެއް އޮތް ނަމަ، އެމީހަކަށް ހިތް ހެޔޮކޮށް މަޢާފްކުރުމާއެކު، އަލުން ގުޅުން އުފެއްދުމަށް އިސް ނެގުމަށް ކަމަށެވެ.

މީގެ އިތުރުން، ފިޠުރު ޢީދުގެ އުފާ ފާހަގަކުރާ އިރު، އަޅުގަނޑުމެންގެ ހަނދާނަށް އެންމެ ފުރަތަމަ ގެންނަންޖެހޭ އެއް ބަޔަކީ، އަޅުގަނޑުމެންގެ މުޖްތަމަޢުގައި ތިބި ފަޤީރުންނާއި ނިކަމެތިންކަމަށާއި، ޢީދުގެ އުފާ ފާހަގަކުރުން ކަނޑައެޅިފައި އޮތީ، އެއްވެސް މީހަކު ބާކީ ނުކޮށް، އަދި އެއްވެސް ތަފާތުކުރުމެއް ނުބާއްވައި، އެންމެން ބައިވެރިވާ އިޖްތިމާޢީ މުނާސަބަތެއްގެ ގޮތުގައި ކަމަށްވެސް އެމަނިކުފާނު ވިދާޅުވިއެވެ. އަދި ފިޠުރު ޢީދުގެ އުފާ ފާހަގަކުރުމަށް ނުކުންނައިރު، އެކަކު އަނެކަކަށް އެހީތެރިވެ ހެޔޮ ފޯރުވައި، މުޅި މުޖްތަމަޢުގައި އުފާވެރިކަން ފެތުރުމަކީ، އަޅުގަނޑުމެން ވަރަށް ބޮޑަށް އިސްކަން ދޭންޖެހޭ ކަމެއް ކަމުގައިވެސް ރައީސުލްޖުމްހޫރިއްޔާގެ ޚިޠާބުގައި ވިދާޅުވިއެވެ.