ސްޕެނިޝް ސުޕަކަޕް ނުވަތަ “ސުޕަ ކޮޕާ ޑި އެސްޕަނާ”ގެ ފައިނަލް މެޗުގައި، މި މުބާރާތް 14 ފަހަރު ކާމިޔާބުކޮށްފައިވާ ބާސެލޯނާގެ މައްޗަށް ރިއާލް މެޑްރިޑުން ތަފާތު ބޮޑުކޮށް ކުރި ހޯދައި، މުބާރާތުގެ ތަށި އުފުލާލައިފިއެވެ. ސައުދީ އަރަބިއާގެ ރިޔާދުގައި ރޭ ކުޅުނު މި މުބާރާތުގެ ތަށި މެޑްރިޑުން ކާމިޔާބުކުރީ 4-1 އިންނެވެ. މިއީ މެޑްރިޑުން މި މުބާރާތް ކާމިޔާބުކުރި 13 ވަނަ ފަހަރެވެ. 

މުޅި މެޗުގައި ވެސް މެޑްރިޑުގެ މޮޅު ކުޅުމެއް ފެނިފައިވާއިރު، އެ ޓީމުން ވަނީ މެޗުގެ 7 ވަނަ މިނެޓުގައި ލީޑު ނަގާފައެވެ. އެއީ ބެލިންގްހަމްގެ ތަފާތު މޮޅު "ތްރޫ ބޯލް" އަކުން، ވިނިސިއަސް ޖޫނިއާ، އޭނާގެ ބާރު ދުވެލީގައި ގޮސް ބޯޅަ ހޯދާ، ކީޕަރު ކައިރިން ނައްޓާލުމަށްފަހު ކާމިޔާބުކުރި ރީތި ގޯލެކެވެ.

މެޗުގެ ދެވަނަ ގޯލު ވެސް ކާމިޔާބުކުރީ ވިނީސިއަސްއެވެ. މިއީ ފުރަތަމަ ގޯލު ޖެހިތާ 3 މިނެޓު ފަހުން، ރޮޑްރީގޯ ބާސެލޯނާގެ ގޯލު ކުރިމައްޗަށް ހުރަސްކޮށްލި ބޯޅައެއް ފަސޭހަކަމާއެކު ގޯލު ތެރެއަށް ފޮނުވާލައިގެން އޭނާ ކާމިޔާބުކުރި ގޯލެކެވެ. 

ލިބުނު ހަނި ފުރުސަތެއްގައި، ބާސެލޯނާގެ ފޯވާޑް، ރޮބާޓް ލެވަންޑޯސްކީ އެ ޓީމަށް އުއްމީދު އާކޮށްދިނެވެ. އެއީ މެޗުގެ 33 ވަނަ މިނެޓުގައި ބާސެލޯނާއިން މެޑްރިޑްގެ ގޯލު ކުރިމައްޗަށް ކުރި ހުރަސް، މެޑްރިޑްގެ ޑިފެންޑަރު ރުޑީގާ ބޮލުން ސާފުކޮށްލުމުން، ޕެނަލްޓީ އޭރިއާގެ ރޮނގުމަތީގައި ހުރެފައި ބޯޅަ ވެއްޓުމުގެ ކުރިން ފޮނުވާލައި، ލެވަންޑޯސްކީ ކާމިޔާބުކުރި ގޯލެކެވެ.

މެޑްރިޑުން މެޗުގެ ލީޑު އަނެއްކާވެސް ފުޅާ ކުރީ މެޗުގެ 39 ވަނަ މިނެޓުގައި ލިބުނު ޕެނަލްޓީއަކުން ވިނީސިއަސްއެވެ. އެއީ އޭނާ ހެޓްރިކް ފުރިހަމަކުރި ގޯލެވެ.

އެ ޓީމުގެ 4 ވަނަ ގޯލު ފެނިގެން ދިޔައީ މެޗުގެ 64 ވަނަ މިނެޓުގައެވެ. އެއީ މުޅި މެޗުގައި ވެސް މޮޅު ކުޅުމެއް ދެއްކި ރޮޑްރީގޯ ކާމިޔާބުކުރި ގޯލަކުންކުނެވެ.

މުބާރާތުގެ ފައިނަލަށް ބާސެލޯނާ އައީ ސެމީ ފައިނަލްގައި އޮސާސޫނާ ބަލިކުރުމަށްފަހުއެވެ. އަދި މެޑްރިޑު ފައިނަލުން ޖާގަ ހޯދީ އެތުލެޓިކޯ މެޑްރިޑް ބަލިކުރުމަށްފަހުއެވެ. 

މި މުބާރާތުގައި ވާދަކުރަނީ 4 ޓީމެވެ. އެއީ ކޮޕަޑެލްރޭގެ ޗެމްޕިއަން އަދި ރަނާސްއަޕާއި ސްޕެނިޝް ލީގުގެ ޗެމްޕިއަނުންނާއި ދެވަނަ ޓީމެވެ.

މިއީ ސްޕެނިޝް ސުޕަކަޕް ސައުދީ އަރަބިއްޔާގައި ކުޅުނު ދެވަނަ ފަހަރެވެ. މި މުބާރާތް ސައުދީ އަރަބިއްޔާގައި ކުޅެނީ ސްޕެއިންގެ ފުޓުބޯޅަ ފެޑެރޭޝަނާއި ސައުދީ ސަރުކާރާއި ވެފައިވާ އެއްބަސްވުމެއްގެ ދަށުންނެވެ.