ރައްޔިތުންގެ މަޖިލީހުގެ 2024 ވަނަ އަހަރުގެ ފުރަތަމަ ދައުރުގެ ފުރަތަމަ ޖަލްސާ 5 ފެބުރުވަރީ 2024 ވާ ހޯމަ ދުވަހުގައި ބޭއްވުމަށް ރައްޔިތުންގެ މަޖިލީހުގެ ރައީސް، އޮނަރަބަލް މުޙައްމަދު އަސްލަމް ނިންމަވާފައިވާ ކަމުގައި ރައްޔިތުންގެ މަޖިލީހުގެ އިދާރާއިން ވިދާލުވެއްޖެއެވެ.

އައު ދައުރަށް މަޖިލިސް ހުޅުވުމުގެ ޖަލްސާގައި، ރައީސުލްޖުމްހޫރިއްޔާ، ރިޔާސީ ބަޔާން އިއްވަވާނެއެވެ. އެހެން ކަމުން އެދުވަހު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްވަވާ ރިޔާސީ ބަޔާން ވެގެންދާނީ، އެމަނިކުފާނުގެ ރިޔާސީ ދައުރުގެ ފުރަތަމަ ބަޔާނަށެވެ.

ކޮންމެ އަހަރެއްގެވެސް އައު ދައުރަށް ރައްޔިތުންގެ މަޖިލިސްހުޅުވާ ދުވަހަކީ، ސަރުކާރު ބަންދު ދުވަހެއްގެ ގޮތުގައި ހަމަޖައްސަވައެވެ. މިއަހަރުގެ ރައްޔިތުންގެ މަޖިލިހުގެ ފުރަތަމަ ދައުރުގެ ފުރަތަމަ ޖަލްސާ ބޭއްވުމަށް ކަނޑައެޅުއްވި ފެބުރުއަރީ މަހުގެ 5 ވަނަ ދުވަސް ދިމާވަނީ ހަފްތާއިން ހޯމަ ދުވަހަކަށެވެ.

މިއަހަރުގެ ފުރަތަމަ ދައުރު ފެބުރުއަރީ މަހުގެ 5 ވަނަ ދުވަހު ފަށާއިރު، މި ދައުރު ވެގެންދާނީ، 19 ވަނަ ރައްޔިތުންގެ މަޖިލީހުގެ އެންމެ ފަހު ދައުރަށެވެ. އައު މަޖިލިސް ހޮވުމަށް ބާއްވާ އިންތިޚާބު، މާރިޗު މަހުގެ 17 ވަނަ ދުވަހު ބޭއްވުމަށް ނިންމައި އިލެކްޝަންސް ކޮމިޝަނުން އިންތިޚާބު ޢިއުލާނުކޮށްފައި ވާއިރު، 28 މެއިއަށް 19 ވަނަ ރައްޔިތުންގެ މަޖިލިހުގެ ދައުރުހަމަވެ އެ މަޖިލިސް އުވިގެންދާނެއެވެ.