މާރިޗު މަހުގެ 15 ގެ ކުރިން ރާއްޖޭގައި ތިބި އިންޑިއާ ސިފައިން އަނބުރާ ގެންދިޔުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުށައަޅުއްވައިފިއެވެ.

ރާއްޖެއާ އިންޑިއާ ސަރުކާރުގެ މަތީ ފަންތީގެ މަޝްވަރާ ބައްދަލުވުމެއް މިއަދު ވަނީ ކުރިޔަށް ގެންގޮސްފައެވެ. މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ، ރައީސުލްޖުމްހޫރިއްޔާގެ އޮފީހުގެ ޕޮލިސީ ޑިރެކްޓަރު އަބްދުﷲ ނާޒިމް އިބްރާހީމް ވިދާޅުވީ، ދިވެހި ސަރުކާރުގެ ފަރާތުން ރައީސުލްޖުމްހޫރިއްޔާ ހުށައަޅުއްވާފައި ވަނީ މާރިޗު މަހުގެ 15 ނިޔަލަށް އިންޑިއާ ސިފައިން ރާއްޖެއިން ބާލައިނިންމުމަށެވެ.

ނާޒިމް ވިދާޅުވީ ދެޤައުމުގެ އިސްބޭފުޅުން ބައިވެރިވެވަޑައިގެން މިހާރު ކުރިޔަށްދާ ބައްދަލުވުންތަކުގައި މަޝްވަރާ ކުރެވެމުން ދަނީ އެކަމުގެ މައްޗަށް ކަމަށެވެ.

ނާޒިމް ވިދާޅުވީ ސަރުކާރުން ފާހަގަ ކުރާ އެންމެ މުހިއްމު ނުކުތާއަކީ އިންޑިއާ ސިފައިންނަށް ރާއްޖޭގައި ޤާއިމްވެ ނުތިބެވޭނެކަން ކަމަށާއި، ރައްޔިތުން އެދޭ ގޮތަކީ އެއީ ކަމަށެވެ. އަދި ރާއްޖެއިން އިންޑިއާ ސިފައިން ބޭލުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދެއްކަންވެސް ނާޒިމް ފާހަގަކުރެއްވިއެވެ.

ރާއްޖޭގަައި އެންމެ ފުރަތަމަ އިންޑިއާ ސިފައިން ޤާއިމްވެ ތިބުމުގެ ހުއްދަ ދެއްވީ ރައީސުލްޖުމްހޫރިއްޔާ މުޙައްމަދު ނަޝީދުގެ ވެރިކަމުގައި އެމަނިކުފާނެވެ. ރާއްޖޭގައި އިންޑިއާ ސިފައިންގެ 87 މީހުން ޤާއިމްވެ އެބަތިބި ކަމުގައި މިސަރުކާރުން ވަނީ ބުނެފައެވެ.