Advertisement
ވަޒީރުންގެ މަޖިލީހުގެ ބައްދަލުވުމުގެ ތެރެއިން --
ސަރުކާރުގެ މަޝްރޫއުތައް ހިންގުމަށް އިތުރު ކުންފުންޏެއް އުފައްދަވަން ނިންމަވައިފި
ސަރުކާރުގެ މަޝްރޫޢުތައް ހިންގުމަށް އެމްޓީސީސީ ފިޔަވައި އިތުރު ކުންފުންޏެއް އުފެއްދެވުމަށް ވަޒީރުންގެ މަޖިލީހުގެ ލަފާފުޅާއި އެކު ރައީސުލްޖުމްހޫރިއްޔާ ޑޜ. މުޙައްމަދު މުޢިއްޒު ނިންމަވައިފިއެވެ.
މިކަން ހާމަކުރެއްވީ، މިއަދު ބޭއްވި ވަޒީރުންގެ މަޖިލީހުގެ ނިންނެމެވުންތަކާއި ގުޅޭ ގޮތުން މީޑިއާއަށް މައުލޫމާތު ދެއްވުމަށް ބޭއްވި ނޫސްވެރިންގެ ބައްދަލުވުމުގައި، ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، ޢަބްދުﷲ ނާޡިމް އިބްރާހީމްއެވެ.
ނާޒިމް ވިދާޅުވީ، ރައީސުލްޖުމްހޫރިއްޔާ އެގޮތަށް ނިންމެވީ، ސަރުކާރުން ކުރިޔަށް ގެންދާ އިންފްރާސްޓްރަކްޗަރގެ ގިނަ މަޝްރޫއުތަކެއް ހުއްޓިފައި ވުމާއި އެކު، އެކަމަށް ޙައްލެއް ގެނައުމުގެ ގޮތުން ކަމަށެވެ.
މީގެ އިތުރުން ނާޒިމް ވިދާޅުވީ، މިއަދުގެ ވަޒީރުންގެ މަޖިލީހަށް މިނިސްޓްރީ އޮފް ފިނޭންސް އިން ހުށައެޅި ކަރުދާހުގެ މައްޗަށް ވަޒީރުންގެ މަޖިލީހުގައި މަޝްވަރާ ކުރައްވައި، ދައުލަތުގެ ކުންފުނިތަކަކީ ފައިދާވާ ކުންފުނިތަކަށް ހެދުމުގައި އަމަލު ކުރާނޭ ގޮތާއި ގުޅޭ ސިޔާސަތުތަކެއް އެކުލަވާލެއްވުމަށްވެސް ނިންމެވި ކަމަށެވެ.
މިއަދު ބޭއްވި ވަޒީރުންގެ މަޖިލީހުގެ ބައްދަލުވުމަކީ، މިއަހަރު ބޭއްވި ވަޒީރުންގެ މަޖިލީހުގެ 2 ވަނަ ބައްދަލުވުމެވެ.
