ރައްޔިތުންގެ މަޖިލިސް އިންތިހާބު އެމްޑީޕީން ބޮޑު އަގުލަބިއްޔަތަކުން ކާމިޔާބުކުރާނެ ކަމަށް މާލޭ މޭޔަރުކަމަށް އިންތިހާބުވި އާދަމް އާޒިމް ރޭ ވިދާޅުވެއްޖެއެވެ.

މޭޔަރުކަމަށް އިންތިހާބުވުން ފާހަގަކުރުމަށް ރޭ ސަލްޓަން ޕާކުގައި ބޭއްވި ޖަލްސާގައި އާޒިމް ވިދާޅުވީ، ދެން އެންމެ ބޮޑު އަމާޒަކީ މަޖްލިސް އިންތިހާބު ކަމަށާއި، އެ އިންތިހާބު ކާމިޔާބު ކުރާނީ ބޮޑު އަގުލަބިއްޔަތުން ކަމަށެވެ.

"އަޅުގަނޑުމެންނަށް ބައެއް ފަހަރު މާޔޫސްކަން ފެނުނަސް ފަހަތެއް ނުފެނޭ. އަޅުގަނޑުމެންނަށް ފެންނަނީ ކުރި. އެމްޑީޕީގެ ކުރިމަގު ވަރަށް އުޖާލާ" އާޒިމް ވިދާޅުވިއެވެ.

އާޒިމް ވިދާޅުވީ ހުރިހާ މެންބަރުން ވެސް މަސައްކަތްކުރަންވީ ޕާޓީ އިތުރަށް ވަރުގަދަކުރުމަށް ކަމަށެވެ. އޭނާ ވިދާޅުވީ އެމްޑީޕީއިން އަބަދުވެސް ފެންނަނީ ކޮންމެ ކާމިޔާބީއަކާ އެކީވެސް މަޑުކޮށްލާތަން ކަމަށާއި، އެކަން ބަދަލުކޮށް ކޮންމެ ކާމިޔާބީއަކާ އެކު ގަދަޔަށް، ބާރަށް މަސައްކަތް ކުރަން ޖެހޭ ކަމަށެވެ.

އާޒިމްގެ އިތުރުން މިއަދުގެ އިންތިހާބުގައި ވާދަ ކުރެއްވީ ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ ކެންޑިޑޭޓު އާޒިމާ ޝަކޫރާއި ދަ ޑިމޮކްރެޓްސްގެ ކެންޑިޑޭޓު ސައިފު ފާތިހާއި އަމިއްލަ ގޮތުން ވާދަ ކުރެއްވި ހުސެއިން ވަހީދާއި ޝުއައިބު އަލީއެވެ.

އާޒިމް މޭޔަރު އިންތިހާބު ކާމިޔާބުކުރެއްވީ 44.8 ޕަސެންޓު ކާމިޔާބުކުރައްވައިގެންނެވެ. ދެވަނައަށް އެންމެ ގިނަ ވޯޓު ހޯއްދެވި ކުރީގެ ބަންޑާރަ ނައިބު އަދި ރައީސް އޮފީހުގެ މިނިސްޓަރު، އާޒިމާ ޝަކޫރަށް ލިބިވަޑައިގެންނެވީ 29.6 ޕަސެންޓެވެ.

މިއަދުގެ އިންތިހާބުގައި 54،680 މީހުންނަށް ވޯޓުލުމުގެ ހައްގު ލިބުނެވެ. ނަމަވެސް ވޯޓުލާން ނުކުތީ 31 ޕަސެންޓު މީހުންނެވެ. އެއީ 17442 މީހުންނެވެ.