މިއަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބަށް ކުރިމަތިލާން ބޭނުންވާ ކެންޑިޑޭޓުންނަށް ކެންޑިޑެންސީ ހުށައެޅުމަށް މިހިނގާ ޖެނުއަރީ މަހުގެ 30 ވަނަ ދުވަހު ފުރުޞަތު ހުޅުވާލުމަށް ނިންމާފައިވާކަމުގައި އިލެކްޝަންސް ކޮމިޝަނުން ވިދާޅުވެއްޖެއެވެ.

އެކޮމިޝަނުން ވިދާލުވީ، މަޖިލިސް އިންތިޚާބަށް ކެންޑިޑެންސީ ހުށައެޅުމުގެ ފުރުޞަތު ދިނުމަށް ކޮމިޝަނުން ނިންމާފައި ވަނީ، ޖެނުއަރީމަހުގެ 30 ވަނަ ދުވަހުން ފެށިގެން ފެބުރުއަރީ މަހުގެ 14 ވަނަ ދުވަހުގެ ނިޔަލަށް ކަމަށެވެ.

އައު މަޖިލިސް ހޮވުމަށް އިދާރީ ދާއިރާތައް ކަނޑައަޅާފައި ވާއިރު، މިފަހަރުގެ އިންތިޚާބުގައި 93 ދާއިރާއަކަށް މެމްބަރުން ހޮވާނެއެވެ.

އިލެކްޝަންސް ކޮމިޝަނުން މިހާރު ނިންމާފައި ވަނީ، ރައްޔިތުންގެ މަޖިލީހަށް މެމްބަރުން ހޮވުމަށް ބާއްވާ އިންތިޚާބުގެ ވޯޓުލުން، މިއަހަރުގެ މާރިޗު މަހުގެ 17 ވަނަ ދުވަހު ބޭއްވުމަށެވެ. މިއިންތިޚާބުގައި ޖުމުލަ 284327 މީހުންނަށް ވޯޓު ދިނުމުގެ ހައްޤުލިބިގެންވެއެވެ.