ދައުލަތުގެ ގިނަ އިސް މަޤާމުތަކެއް ފުރުައްވާފައި ވާއިރު، ވަޒީފާއެއް ގެއްލިގެން އެންމެ ދެރަވި ވަޒީފާއަކީ، ޖެންޑަރ މިނިސްޓަރުކަމުގެ މަޤާމުކަމުގައި، މާލޭ ސިޓީ ކައުންސިލް އިންތިޚާބުގައި ވާދަކުރައްވާ ޕީޕީއެމް ޕީއެންސީ ޓިކެޓުގައި މާލޭ ސިޓީގެ މޭޔަރު ކަމުގެ މަޤާމަށް ވާދަކުރައްވާ ޢާއިޝަތު ޢާޒިމާ ޝަކޫރު ވިދާޅުވެއްޖެއެވެ.

އާޒިމާ މިހެން ވިދާޅުވީ، "ނޫން.އެމްވީ" އިން ގެނެސްދޭ "ޚާދިމް" ޕްރޮގްރާމްގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.

އާޒިމާ ޖެންޑަރ މިނިސްޓަރުކަމުގެ ވަޒީފާ އަދާކުރެއްވީ، ރައީސް ޑރ. މުޙައްމަދު ވަހީދުގެ ސަރުކާރުގައެވެ. އެކަމަނާ އެމަޤާމުން ވަކިވެވަޑައިގަންނަވަން ޖެހިވައިޑައިގަތީ ރައްޔިތުން މަޖިލީހުން ރުހުން ނުދެއްވުމުންނެވެ. އެހެން ނަމަވެސް އޭގެ ފަހުން ބަންޑާރަ ނައިބު ކަމުގެ މަޤާމަށް އެކަމަނާ ހަމަޖެއްސެވުމަށް މަޖިލީހުން ރުހުން ދެއްވިއެވެ.

މިޕްރޮގްރާމްގައި އާޒިމާ ވަނީ، މާލޭގެ ސިޓީގެ މޭޔަރުކަމުގެ މަޤާމަށް އިންތިޚާބުވެވަޑައިގެންފިނަމަ ކުރައްވާނޭ ކަންކަމާއި، އަދި އަމިއްލަ ޒާތީ ދިރިއުޅުއްވުމާއި، އަދާކުރެއްވި ވަޒީފާތަކުގައި ކުރިމަތިވި ގޮންޖެހުންތަކާއި، ކުރިމަތިވި ނުރައްކާތަކާއި ގުޅޭ ގޮތުންވެސް ވާހަކަފުޅު ދައްކަވާފައެވެ. މިގޮތުން އާޒިމާއަށް އެންމެ ފުރަތަަމަ ބައްޕާފުޅު ދެއްވި ނަމަކީ، "ޢާލިޔާ"ކަން އާޒިމާ ޕްރޮގްރާމުގައި ފާހަގަކުރެއްވިއެވެ.

އާޒިމާ ވިދާޅުވީ، ޖެންޑާ މިނިސްޓްރީއަކީ، އެކަމަނާ ވަރަށް މަސައްކަތް ކުރާ ހިތުން މަސައްކަތް ކުރެއްވި ތަނެއް ކަމަށެވެ. އަދި އޭރު ޖެންޑާ މިނިސްޓަރަކަށް ހުންނެވި އިރު ކުޑަކުދިންގެ ހިޔާއަށް ކޮންމެ ދުވަހަކުވެސް ޒިޔާރަތް ކުރެއްވި ކަމުގައި އާޒިމާ ވިދާޅުވިއެވެ.

އާޒިމާ ވިދާޅުވީ، ޤާނޫނީ ދާއިރާއިން ތަޢުލީމު ހާސިލްކުރައްވައިގެން، އެދާއިރާގައި މަސައްކަތް ކުރެއްވި ނަމަވެސް އިޖުތިމާޢީ ޚިދުމަތުގެ ދާއިރާގައި އާއިލާ އާއެކު ފުރާވަރު އުމުރުންފެށިގެން މަސައްކަތްތައް ކުރެވުނު ކަމަށާއި، އެހެންކަމުން އަދިވެސް އިޖުތިމާޢީ ޚިދުމަތުގައި ކުރިޔަށް ވަޑައިގެންނެވުމަކީ ކުރައްވާ އުއްމީދެއް ކަމަށެވެ.