ހޮނިހިރުދުވަހު، ބާއްވާ މާލޭ ސިޓީކައުންސިލްގެ މޭޔަރު ހޮވުމަށް ބާއްވާ ބައި އިލެކްޝަން ކާމިޔާބު ކުރެއްވިއްޖެނަމަ، އެންމެ ފުރަތަމަކަމަށް ކުރައްވާނެ ކަމަކީ މާލެ ސާފުކުރުން ކަމުގައި، ޕީޕީއެމް ޕީއެންސީ ކޯލިޝަންގެ މޭޔަރު ކެންޑިޑޭޓް އަލްއުސްތާޛާ އާއިޝަތު އާޒިމާ ޝަކޫރު ވިދާޅުވެއްޖެއެވެ.

އާޒިމާ މިހެން ވިދާޅުވީ، "ނޫން.އެމްވީ"ގެ "ޚާދިމް" ޕްރޮގްރާމުގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.

އާޒިމާ ވިދާޅުވީ، މާލޭގައި މިހާރު ހުރި މައްސަލަތައް ހައްލު ކުރުމަށް ތިން ލެވެލްއެއްގައި އޮތީ މަސައްކަތްތައް ކުރަން ޖެހިފައި ކަމަށެވެ. މިގޮތުން ކަންކަން ތަންފީޒު ކުރުމަކީ އެންމެ އިސްކަންދޭންޖެހޭ ކަންތައްތައް ކަމަށާއި މިގޮތުން މަގު ހިނގާ މީހުންނާއި މަގުމަތި ބޭނުންކުރާ މީހުންނަށް ރައްކާތެރިކަމާއި ސަލާމަތްތެރިކަން ހޯދައިދޭން ޖެހޭކަމުގައި އާޒިމާ ވިދާޅުވިއެވެ.

އާޒިމާ ވިދާޅުވީ، މާލޭ ސިޓީގެ މޭޔަރު ކަމުގެ މަޤާމަށް ކޮންމެ ބޭފުޅަކު އިންތިޚާބުވިނަމަވެސް، ރައްޔިތުންނަށް މެދު ނުކެނޑި ޚިދުމަތްތައް ދެވޭނޭ ގޮތަށް އޮނިގަނޑުތައްވެސް އޮތީ އިސްލާޙް ކުރަންޖެހިފައި ކަމަށެވެ. އަދި މިހާރު މާލޭގެ ހާލަތު އޮތް ގޮތުން ހުރި ބޮޑެތި މައްސަލަތަކަކީ، އަޅައިނުލައި ދޫކޮށްލެވެން އޮތް މައްސަލަތަކެއް ނޫންކަމަށާއި، އެމައްސަލަތައް ހައްލުކުރާނެ ގޮތްތައް އޭނާގެ މެނިފެސްޓޯގައި ހިމަނުއްވާފައިވާ ކަމުގައިވެސް އާޒިމާ ވިދާޅުވިއެވެ.

މާލޭ ސިޓީގެ މޭޔަރު އިންތިޚާބު ކުރުމަށް ބާއްވާ އިންތިޚާބުގެ ވޯޓުލުން އޮންނާނީ ހޮނިހިރު ދުވަހުގައެވެ.