ހަސަން ކުރުސީގެ ނަމުގައި އެކްސްގައި ހިންގަމުން އަންނަ އެކައުންޓަކީ، ކުރީގެ ރައީސް މުޙައްމަދު ނަޝީދުގެ ދޮށީ ދަރިކަނބަލުން މީރާ ލައިލާ ނަޝީދު ހިންގަވާ އެކައުންޓެއް ކަމަށް ބުނެ ފަތުރަމުން އަންނަ ވާހަކަތައް، ރައީސް ނަޝީދު ދޮގުކުރައްވައިފިއެވެ.

އެ އެކައުންޓަކީ މީރާ ހިންގަވާ އެކައުންޓެއް ކަމަށް ބުނެ އިންޑިއާގެ ބައެއް ފަރާތްތަކުންނާއި، ދިވެހިރާއްޖޭގެ ބައެއް ފަރާތްތަކުން ސޯޝަލް މީޑިއާގައި ދައްކާފައިވާ ވާހަކަތަކަށް މީރާވެސް ވަނީ ރައްދުދީފައެވެ. އަދި އެ އެކައުންޓަކީ އޭނާ ހިންގަވާ އެކައުންޓެއް ނޫންކަމަށް ރައީސް ނަޝީދުގެ ދޮށީ ދަރިކަނބަލުން މީރާވެސް ވަނީ ވިދާޅުވެފައެވެ.

ހަސަން ކުރުސީގެ ނަމުގައި އެ އެކައުންޓް ހިންގަނީ، މީރާ ކަމުގައި ބުނެ ފުރަތަމަ އެކްސްގައި ވާހަކަތައް ފެތުރީ ދިވެއްސެކެވެ. އޭގެ ފަހުން އިންޑިއާ އެކްޓިވިސްޓުން ވަނީ، މިރާ އާއި އެކްސްގައި ދިމާކޮށްލައި، ވަރަށް ހަޑި ހުތުރު އަދި ބޭއަދަބީ ގޮތުގައި ފުރައްސާރަކޮށްފައެވެ.

އިންޑިއާއިން ރާއްޖޭގެ ޓުއަރިޒަމް ބޮއިކޮޓް ކުރުމަށް ފެށި ކެމްޕޭނާއި ގުޅިގެން ހަސަން ކުރުސީގެ އެކައުންޓުން ވެސް ވަނީ އިންޑިއާއަށް ފާޑުކިޔައި އަދި މަލާމާތްކޮށް ޕޯސްޓްތައް ކޮށްފައެވެ.

ހަސަން ކުރުސީގެ ނަމުގައި، އެކްސްގައި އެކައުންޓެއް ހިންގަމުންދާ ފަރާތަކީ ކޮބައިކަން ހޯދުމަށް، ރައީސް ނަޝީދުގެ ފަރާތްޕުޅުންވެސް މީގެ ކުރިން ފުލުހުންނަށްވެސް މައްސަލަ ހުށައަޅުއްވާފައިވެއެވެ.

އެ އެކައުންޓުން ވިސިލްބްލޯކޮށް ކޮރަޕްޝަނާއި ފަސާދައިގެ އަމަލުތައް ހުއްޓުވާފައިވެސް ވެއެވެ، އެހެން ނަމަވެސް ހަމަ އެ އެކައުންޓުން ކުރާ ޕޯސްޓްތަކުގައި، މީހުންގެ އަބުރާ އިންސާނީ ކަރާމަތާއި ޤަދަރަށް އަރައިގަނެ، މުޖުތަމަޢާއި ދޭދޭ ޤައުމުތަކުގެ މެދުގައި އޮންނަ ގުޅުމާއި، ސަރުކާރާއި ސިޔާސީ ވެރިންނާއި މެދު ނަފްރަތާއި ރުޅިވެރިކަން އުފެއްދޭފަދަ ޕޯސްޓްތައްވެސް ކޮށްފައެވެ.