ގދ. ތިނަދޫގެ އާބާދީ މަދުވުން ކޮންޓްރޯލް ކުރުމުގެ ގޮތުން، ތިނަދޫގެ ރައްޔިތުންގެ ތެރެއިން އެރަށުގެ ރަށްވެރިކަން ދޫކޮށްލާ ފަރާތްތަކުގެ އަތުން 5000 ރުފިޔާގެ ފީއެއް ނެގުމަށް ތިނަދޫ ސިޓީ ކައުންސިލުން ނިންމި ނިންމުން ލޯކަލްގަވަރމެންޓް އޮތޯރިޓީ އެލްޖީއޭއިން ބާޠިލްކޮށްފިއެވެ.

އެމައްސަލަ އެލްޖީއޭގެ ބޯޑަށް ހުށައެޅުމާއި އެކު މިއަދު ބޭއްވި ބޯޑު ބައްދަލުވުމުގައި ނިންމާފައި ވަނީ، އެއީ ތިނަދޫ ސިޓީ ކައުންސިލަށް ޤާނޫނީ ގޮތުން އެކައުންސިލަށް ނިންމޭނެ ނިންމުމެއް ނޫންކަމަށެވެ. މިގޮތުން އެނިންމުމަކީ ދިވެހިޖުމްހޫރިއްޔާގެ ޤާނޫނު އަސާސީގައި ފުށުއަރާ ނިންމުމެއް ކަމުގައިވެސް އެލްޖީއޭއިން ވަނީ ކަނޑައަޅާފައެވެ.

ތިނަދޫއަށް ސިޓީއެއްގެ ދަރަޖަ ލިބިފައިވާއިރު، އެސިޓީގެ އާބާދީއަކީ މިހާރު 10150 އެވެ. އެހެން ނަމަވެސް ދިރިއުޅުމާއި ވަޒީފާ އާއި އެނޫންވެސް ބޭނުންތަކުގައި ރާއްޖޭގެ އެކި ސަރަހައްދުތަކުން މާލެއަށް ހިޖުރަކޮށް ރަށްވެހިކަން ބަދަލުކުރާ ފަރާތްތައް އިތުރުވަމުން ދިޔުމާއި އެކު، އެކަމުގެ ގޮންޖެހުންތައްވެސް ކައުންސިލްތަކާއި ކުރިމަތިވެއެވެ.