ޢިޖުތިމާޢީ ޚިދުމަތްތެރިންނާއި ކައުންސިލިން ދާއިރާ އިން މީހުން ތަމްރީނު ކުރުމުގެ ގޮތުން ކޯސްތަކެއް ހިންގުމަށް ރާވައި އެމަސައްކަތް ފަށާފައިވާ ކަމުގައި، އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ބުނެފިއެވެ.

އެވުޒާރާއިން ބުނީ، މިކޯސްތައް ހިންގުމަށް ނިންމާފައި ވަނީ އެވުޒާރާ އާއި ދިވެހިރާއްޖޭގެ ޤައުމީ ޔުނިވަރސިޓީ ގުޅިގެން ކަމަށެވެ. މިގޮތުން، ހިންގުމަށް ހަމަޖައްސާފައިވާ ކޯސްތަކުގެ ތެރޭގައި، އެޑްވާންސް ސެޓްފިކެޓުން ފެށިގެން މާސްޓާސްއާ ދެމެދުގެ ކޯސްތަކެވެ. އަދި މިކޯސްތަކުގެ ފުރަތަމަ ބުރުގައި، 100 ފަރާތަކަށް ބައިވެރި ވުމުގެ ފުރުޞަތު ވަނީ ހުޅުވާލާފައި ކަމުގައިވެސް އެވުޒާރާއިން ވަނީ ބުނެފައެވެ.  

މި ކޯސްތަކުގެ ތެރޭގައި ސޯޝަލް ސަރވިސް ދާއިރާއިން އެޑްވާންސް ސެޓިފިކެޓް އަދި ބެޗެލަރސް ޑިގްރީއަށް ކިޔަވައިދޭ ކޯސްތަކާއި، ކައުންސިލިން ދާއިރާއިން ބެޗެލަރސް ޑިގްރީއަށް ކިޔަވައިދޭ ކޯސްތައް ހިމެނޭނެ ކަމުގައިވެސް އެވުޒާރާއިން ވަނީ ހާމަކޮށްފައެވެ. އަދި މި ކޯސްތައް ދެ ބުރަކަށް ބަހާލައިގެން ކުރިއަށް ގެންދިއުމަށް ނިންމާފައިވާ އިރު ފެބްރުއަރީ އަދި އޮގަސްޓު މަހު ކޯސްތަކުގައި ބައިވެރިވުމަށް ހުޅުވާލާނެ ކަމުގައިވެސް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވަނީ ބުނެފައެވެ.

އެވުޒާރާއިން ބުނީ، މި ކޯސްތަކުގެ ފުރަތަމަ ބުރު ފެށުމަށް ހަމަޖެހިފައި ވަނީ އަންނަ ފެބްރުއަރީ މަހުގެ ތެރޭގައި ކަމަށާއި، ކޯހާއި ގުޅޭ އިތުރު މަޢުލޫމާތު ދިވެހިރާއްޖޭގެ ޤައުމީ ޔުނިވަރސިޓީގެ ވެބްސައިޓުން އަދި ހޮޓްލައިން 1445އިން ލިބޭނެ ކަމަށެވެ.