ޤައުމީ އެއާލައިން މޯލްޑިވިއަންގެ ދަތުރުތައް ފުޅާކުރުމަށްޓަކައި އިތުރު މަތިންދާ ބޯޓެއް ކުއްޔަށް ހޯދަން އިޢުލާނުކޮށްފިއެވެ.

މޯލްޑިވިއަން ހިންގާ އައިލެންޑް އޭވިއޭޝަން ސަރވިސް ލިމިޓެޑުން މިއަދުކޮށްފައިވާ އިއުލާނުގައި ބުނެފައި ވަނީ، ބޯއިން 8-787 ގެ ބޯޓެއް ހަ އަހަރު ދުވަހުގެ މުއްދަތަށް އެކުންފުންޏަށް ކުއްޔަށް ހިފުމަށް ބޭނުންވާ ކަމަށެވެ. އަދި ބޯޓު ކުއްޔަށް ދިނުމަށް ޝައުޤުވެރިވާ ފަރާތްތަކުން، އެކަމަށް އެދި ހުށައެޅުމުގެ ފުރުޞަތު މި ޖެނުއަރީ މަހުގެ 25 ވަނަ ދުވަހުގެ މެންދުރު 2:30 އާއި ހަމައަށް އޮންނާނެކަމުގައިވެސް އެކުންފުނިން ވަނީ ބުނެފައެވެ.

ބޯއިން 8-787 މަރުކާގެ މަތިންދާ ބޯޯޓަކީ، ދުރު ދަތުރުތައް ކުރުމަށް ޚާއްސަކޮށް އުފައްދާފައިވާ ރަނގަޅު ޚިދުމަތްތަކެއް ދެވޭ ގޮތަށް ފަރުމާކޮށްފައިވާ ބޯޓެކެވެ. އަދި އެބޯޓުގައި 242 ފަސިންޖަރުން އުފުލޭނެއެވެ.  ބޯއިން ކުންފުނިން އެމަރުކާގެ ބޯޓުތައް އުފައްދަން ފަށާފައި ވަނީ 2009 ވަނަ އަހަރުން ފެށިގެންނެވެ.

މޯލްޑިވިއަންގެ ދަތުރުތައް ފުޅާކުރުމަށް އައިއޭއެސްއިން މިހާރުވެސް އޮތީ، ވައިޑް ބޮޑީ އިތުރު އެއާކްރާފްޓެއް ހޯދަން އިޢުލާނުވެސް ކޮށްފައެވެ.