ސަރުކާރު ކޯލިޝަންގެ ފަރާތުން މާލޭ ސިޓީގެ މޭޔަރުގެ މަޤާމަށް ވާދަކުރައްވާ، އާޒިމާގެ އިތުރު މައްސަލައެއް ކޯޓުގައި އޮތް ކަމަށް ބުނެ ރާއްޖޭގެ ނޫހަކުން ފެތުރީ ދޮގު މައުލޫމާތެއް ކަމަށާއި އެކަމާއި ދެކޮޅަށް ފިޔަވަޅު އަޅުއްވާނެ ކަމުގައި އާޒިމާ ވިދާޅުވެއްޖެއެވެ.

ދައުލަތުގެ ވަރަށް ގިނަ އިސް މަޤާމުތަކެއް ފުރުއްވާފައިވާ، އާޒިމާ ވިދާޅުވީ، ރާއްޖޭގެ ނޫހަކު އެކަމަނާގެ ދަރަންޏާއި ގުޅޭ އިތުރު މައްސަލައެއް ކޯޓުގައި އޮތްކަމަށް ބުނެ ޚަބަރު ފަތުރާފައި ވިޔަސް، ކޯޓުގައި އެފަދަ މައްސަލައެއް ނެތްކަން ކަށަވަރު ކުރައްވާފައިވާކަމަށެވެ. އަދި އެނޫހުން އެޚަބަރު ފެތުރުމުގައި ޢަމަލުކޮށްފައި ވަނީ އެންމެ ރަނގަޅަށް ނޫން ކަމަށާއި، އެކަމުގެ ސަބަބުން އެކަމަނާގެ އިންތިޚާބީ ޚައްޤަކަށް ހުރަސް އެޅިގެންދާކަމަށެވެ. އަދި އެއި އަބުރުގެ މައްސަލައަކަށް ވުރެ ބޮޑަށް ޖިނާޢީ މައްސަލައެއް ކަމުގައިވެސް އާޒިމާ ވިދާޅުވިއެވެ.

އާޒިމާ ވިދާޅުވީ، އެކަމަނާގެ ކަންބޮޑުވުމަކީ، ރަޖިސްޓްރީކޮށްގެން ހިންގާ ރާއްޖޭގެ ނޫހަކުން މަޢުލޫމާތު ސާފުކުރަންވީ މިންވަރަށް މައުލޫމާތު ސާފުނުކޮށް އަދި އެފަރާތަށް އާޒިމާގެ ފަރާތުން މައުލޫމާތު ދިނުމަށް އެކަށީގެންވާ ވަގުތުވެސް ނުދީ އެފަދަ ޚަބަރެއް ޝާއިޢުކުރުން ކަމަށެވެ. އެހެންކަމުގައި އެކަމުގައި އެޅެންހުރި ފިޔަވަޅުތައް ބައްލަވައި އެމައްސަލައިގައި ކުރިޔަށް ވަޑައިގެންނެވުމަށް ވިސްނަވާފައިވާ ކަމުގައި އާޒިމާ ވިދާޅުވިއެވެ.

އަންނަ ހޮނިހިރު ދުވަހު މާލޭ ސިޓީގެ މޭޔަރު އިންތިޚާބު ކުރުމުގެ ބައި- އިލެކްޝަން ބޭްއްވުމަށް ތައްޔާރުވަމުން އަންނައިރު، ކެންޑިޑޭޓުންނަށް އެންޓި ކެމްޕޭން ކުރުމުގެ މައްސަލަތަކާއި ކެނޑިޑޭޓުންގެ އަނބުރާ ޤަދަރަށް އަދިކަރާމާތަށް ގެއްލުން ލިބޭ ގޮތަށް ސޯޝަލް މީޑިއާ އާއި އެހެނިހެން ވަސީލަތްތައް ބޭނުންކޮށްގެން ބައެއް ފަރާތްތަކުން އަމަލުކުރާ މައްސަލަތައް އަންނަނީ އިތުރުވަމުންނެވެ.