އިންޑިއާގެ ބޮޑުވަޒީރު ނަރެންދުރަ މޯދީގެ، ލަކްޝަދީބު ދަތުރުފުޅުގައި ކުރެއްވި ސޯޝަލް މީޑިއާ ޕޯސްޓްތަކަށް ކޮމެންޓްކޮށް ފުރައްސާރަކުރި ތިން ނައިބުން މަޤާމުން ސަސްޕެންޑްކޮށްފިއެވެ.

މަޤާމުން ސަސްޕެންޑްކޮށްފައި ވަނީ، ޔޫތު މިނިސްޓްރީގެ ޑެޕިއުޓީ މިނިސްޓަރުން ކަމަށްވާ މަލްޝާ ޝަރީފާއި މަރިޔަމް ޝިއުނާ އަދި މަހުޒޫމް މާޖިދެވެ.

އެތިން ބޭފުޅުން މަޤާމުން ސަސްޕެންޑްކޮށްފައިވާ ކަން ރައީސުލްޖުމްހޫރިއްޔާގެ އޮފީހުގެ މިނިސްޓަރ އެޓް ދަ ޕްރެޒިޑެންޓްސް އޮފީސް ފޮރ ސްޓްރެޓީޖިކް ކޮމިއުނިކޭޝަން، އިބްރާހީމް ޚަލީލު ކަށަވަރުކޮށްދެއްވިއެވެ.

ރައީސުލްޖުމްހޫރިއްޔާ ވަޒީރުންގެ ނައިބުންގެ ފެންވަރުގައި އައްޔަނުކުރައްވާފައިވާ މިތިން ބޭފުޅުން ވަނީ، އިންޑިއާގެ ބޮޑުވަޒީރު ނަރެންދުރަ މޯދީއަށް ފުރައްސާރަކޮށް އަދި އިންޑިއާގެ އާއްމު ރައްޔިތުންނަށް ނިސްބަތްކޮށް އާއްމުއިޖުތިމާއީ މިންގަނޑާއި ޚިލާފަށް، އަދި، ބައިނަލްއަޤުވާމީ ޑިޕްލޮމަސީއާ، ރާއްޖޭގައި ސިޔާސީ މަޤާމުތަކުގައި ތިއްބަވާ ބޭފުޅުން ޢަމަލުކުރުމަށް އެކަށައަޅާފައިވާ އުސޫލާއި ޚިލާފަށް އަމަލުކޮށްފައެވެ.

އެ ތިންބޭފުޅުން މަޤާމުން ސަސްޕެންޑްކޮށްފައި ވަނީ އެފަރާތްތަކާއި މެދު ފިޔަވަޅު އެޅުމަށާއި މަޤާމުން ވަކިކުރުމަށް އާއްމުންވެސް ގޮވާލަމުންދާ ދަނޑިވަޅެއްގައެވެ.