ށ. ގޮއިދޫގައި ދަނޑުވެރިކަމުގެ ޕްރޮސެސިން ފެސިލިޓީއެއް އަޅަން އެ ރަށު ކައުންސިލުން އިއުލާނުކޮށްފިއެވެ. މި އިއުލާނުގައި ވަނީ ކައުންސިލުގެ އަމިއްލަ ތަކެތީގައި ކުރެހުމާ އެއްގޮތަށް ދަނޑުވެރިކަމުގެ ޕްރޮސެެސިން ފެސިލިޓީއެއް އަޅައިދޭނެ ބަޔަކު ހޯދުމަށެވެ.

މިކަމަށް ޝައުގުވެރިވާ ފަރާތްތަކުން ބީލަމަށް ހުށަހެޅުމުގެ ފުރުސަތު މި މަހުގެ 14 ވަނަ ދުވަހު އޮފީސް ބަންދުކުރުމާ ހަމައަށް ވަނީ ހުޅުވާލާފައެވެ. އެ ރަށު ކައުންސިލުން ވިދާޅުވީ، މިއީ ދަނޑުވެރިން ހައްދާ ތަކެތި ކޮތަޅު ބަންދުކުރުން ފަދަ ކަންކަން ފަސޭހައިން ކުރެވޭނެ ގޮތަށް ގާއިމްކުރާ ފެސިލިޓީއެއް ކަމަށެވެ.

ގޮއިދޫގައި ގާއިމުކުރާ ޕްރޮސެސިން ފެސިލިޓީއަކީ ސާކް ޑެވޮލޮޕްމަންޓް ފަންޑްއިން ހިންގާ "ލައިވްލުހުޑް އެންހޭންސްމަންޓް އޮފް ދަ ސްމޯލް ސްކޭލް ފާރމާސް އިން ސާކް ރީޖަން ތްރޫ ސްމޯލް ސްކޭލް އެގްރި-ބިޒްނަސް ފޯކަސިން އޮން ވެލިއު ޗެއިން ޑެވެލޮޕްމަންޓް" ޕްރޮޖެކްޓުގެ ދަށުން ހިންގާ މަޝްރޫއެކެވެ.

ށ.ގޮއިދޫއަކީ ދަނޑުވެރިކަމުގައި މަޝްހޫރު ރަށެކެވެ. އަދި ރަށުގެ ގިނަ އަދަދެއްގެ ބަޔަކު ދަނީ ދަނޑުވެރިކަމުގައި ހަރަކާތްތެރިވަމުންނެވެ. އެރަށުގައި ގާތްގަނޑަކަށް 200 ދަނޑުބިން އޮވެއެވެ. އޭގެ ތެރޭގައި 3000 އަކަފޫޓުގެ ކުދި ދަނޑުބިމާއި، ވިޔަފާރިތަކަށް ދޫކޮށްފައި އޮތް 10،000 އަކަފޫޓުގެ ދަނޑުބިން ވެސް ހިމެނެއެވެ.