ރައީސުލްޖުމްހޫރިއްޔާ ޑރ މުޙައްމަދު މުއިއްޒުގެ ސަރުކާރުގެ އިސް މަގާމުތަކުގައި ތިއްބެވި ބައެއް ބޭފުޅުންގެ ވާހަކަތަކަކީ ސަރުކާރުގެ ޕޮލިސީ ނޫންކަން އިންޑިއާއަށް ހާމަކޮށްދިނުމަށް ރައީސް މުޙައްމަދު ނަޝީދު ގޮވާލައިފިއެވެ.

ރައީސް ނަޝީދު މިގޮތަށް ގޮވާލެއްވީ، މިހާރުގެ ސަރުކާރުގެ މިނިސްޓްރީ އޮފް ޔޫތު އެމްޕަވަމަންޓް، އިންފޮމޭޝަން އެންޑް އާޓްސްގެ ޑެޕިއުޓީ މިނިސްޓަރެއްގެ މަގާމުގައި ހުންނެވި އަލްފާޟިލާ މަރިޔަމް ޝިއުނާ "އެކްސް" ގައި، އިންޑިއާގެ ބޮޑު ވަޒީރު ނަރެންދްރަ މޯދީއާ ގުޅުވައި ކުރެއްވެވި ޕޯސްޓަކާ ގުޅިގެންނެވެ. އެ ޕޯސްޓުގައި ބުނާ ގޮތުން މޯދީއަކީ ޖޯކަރެކެވެ. އަދި އޭނާއަކީ އިޒްރޭލުގެ "ޕަޕެޓް" އެކެވެ.

ޑެޕިއުޓީ މިނިސްޓަރ މަރިޔަމް ޝިއުނާ "އެކްސް" ގައި ކުރެއްވެވި ޕޯސްޓްގެ ސްކްރީން ޝޮޓެއް

މި ޕޯސްޓާ ގުޅިގެން ކަންބޮޑުވުން ފާޅު ކުރައްވަމުން ރައީސް ނަޝީދު ވިދާޅުވީ، ސަރުކާރުގެ އިސް މަގާމެއްގައި ހުންނަވައި، ރާއްޖޭގެ ސަލާމަތާއި އިގްތިޞާދާއި ގުޅުންހުރި މުހިންމު ގައުމެއްގެ ލީޑަރަކަށް ނިސްބަތްކޮށް މިފަދަ ބޭ އިޙްތިރާމާއި ބޭއަދަބީ ބަސްތަކެއް ބޭނުން ކުރުމަކީ ބަލައިގަނެވޭނެ ކަމެއް ނޫނެވެ. އަދި މިފަދަ ކޮމެންޓުތަކުން ސަރުކާރާއި ސަރުކާރުގެ ވެރިން ދުރުވާން ޖެހޭނެކަމާއި، މި ފަދަ ކޮމެންޓުތަކަކީ ސަރުކާރުގެ ޕޮލިސީ ރަމްޒުކޮށްދޭ ކޮމެންޓުތަކެއް ނޫންކަން އިންޑިއާއަށް ހާމަކޮށްދިނުމަށް، ރައީސުލްޖުމްހޫރިއްޔާ ޑރ މުޙައްމަދު މުއިއްޒުއަށް އެދިވަޑައިގެންފައިވެއެވެ.

ސަރުކާރުގެ އިސް ބައެއް ބޭފުޅުންނާއި، ސަރުކާރަށް ތާއީދުކުރައްވާ ބައެއް ބޭފުޅުންގެ ފަރާތުން މިފަދަ ޕޯސްޓުތައް ޕޯސްޓްކުރަން ފެށީ އިންޑިއާގެ ބޮޑުވަޒީރު ނަރެންދުރަ މޯދީ، އިންޑިއާގެ ޓެރިޓަރީއެއްގެ ގޮތުގައި އޮތް ލަކްޝަދީބަށް ކުރެއްވި ރަސްމީ ދަތުރުފުޅުގައި، ލަކްޝަދީބުގެ ޓުއަރިޒަމް ޕްރޮމޯޓް ކުރެއްވުމަށް، ސޯޝަލްމީޑިއާއަށް ދޫކޮށްލި ޕޯސްޓްތަކާ ގުޅިގެންނެވެ. އަދި މި ރައްދުތަކާއި ގުޅިގެން ދެޤައުމުގެ ދެމެދުގައި ނުތަނަވަސްކަން ވެސް ވަނީ ބޮޑުވެފައެވެ.

މީގެ އިތުރުން މިކަމާ ގުޅިގެން ރާއްޖެއަށް ޗުއްޓީހޭދަކުރުމަށް އިންޑިއާގެ ރައްޔިތުން ނުދިޔުމަށް ގޮވާލައި އިންޑިއާގައި ސޯޝަލްމީޑިއާ ކެމްޕޭންތައް ވަރުގަދަ ކުރަމުންދާއިރު، ރާއްޖެއަށް ޗުއްޓީ ހޭދަކުރަން އައުމަށް ރާވާފައިވާ ބައެއް ފަރާތްތަކުން އެފަރާތްތަކުގެ ބުކިންތައް ކެންސަލްކޮށް ސޯޝަލް މީޑިއާގައި އެކަން ދަނީ ހާމަކުރަމުންނެވެ.