ރާއްޖޭ ހުޅަނގު ދެކުނުން ކާލްސް ބާގު ރިޖްއަށް، ރިކްޓަރ މިންގަނޑުން 5.6 ގެ ބާރު މިނުގައި ބިންހެލުމެއް އަތުވެއްޖެއެވެ. 

މޫސުމާއި ބެހޭ ޤައުމީ އިދާރާއިން ބުނީ މިބިންހެލުމުގެ އަސަރު ރާއްޖެއަށް ކުރާނެ ކަމަށް ނުބެލެވޭ ކަމަށެވެ. ޔޫއެސް ޖިއޮލޮޖިކަލް ސާރވޭ އިން ބުނީ ބިންހެލުން އައިސްފައި ވަނީ ރާއްޖޭގަޑިން މިއަދު ހަވީރު، 4:46 ގައި ކަމަށެވެ. ބިންހެލުން އައިސްފައިވަނީ، ދ. ކުޑަހުވަދޫގެ ހުޅަނގު ދެކުނުން 824 ކިލޯމީޓަރު ދުރުން، ކާލްސް ބާގު ރިޖްއަށެވެ. 

ބިންހެެލުން އައިތަން ---

މިބިންހެލުމުގެ ނާރެސް ހުރީ، ކަނޑުގެ 10 ކިލޯމީޓަރު ފުނުގައެވެ. އެހެންކަމުން މިބިންހެލުމާއި ގުޅިގެން ސުނާމީގެ އިންޒާރެއް ނެރެފައެއް ނުވެއެވެ.

ކާލްސް ބާގު ރިޖްއަށް ހުސްވި ޑިސެމްބަރު މަހުގެ 29 ވަނަ ދުވަހުވެސް، ރިކްޓަރ މިންގަނޑުން 5.0އަށް ވުރެ ބާރުގަދަ 4 ބިންހެލުން ގާތްގާތުގައި އައިސްފައިވެއެވެ.