ޑރ. މުހައްމަދު މުޢިއްޒުގެ ހައުސިންގ މިނިސްޓަރު ކަމުގައި، މާލޭގައި "ރަސްފަންނު މިކްސްޑް ޔޫސް ޑިވެލޮޕްމަންޓް"ގައި ފެށި ޕްރޮޖެކްޓްގެ ބޭނުމަށް ބަންދުކުރި، ސަބުދެލި މަގު އަލުން ހުޅުވާލުމުގެ މަސައްކަތް، ފަށައިފިއެވެ.

މިމަސައްކަތް ކުރަމުން ދަނީ މިނިސްޓްރީ އޮފް ސިޓީސް ލޯކަލް ގަވަރމެންޓް އެންޑް ޕަބްލިކް ވޯކްސް މިނިސްޓްރީންނެވެ. ސަބުދެލި މަގުން ބަންދުކޮށްފައި އޮތީ ހިރިޔާ ސްކޫލާއި، ސޯޝަލް ސެންޓަރާއި ދެމެދުން އޮތް ބައެވެ. އެމިނިސްޓްރީން ބުނީ، އެބަންދުކޮށްފައިވާ އެސަރަހައްދު ހުޅުވާލަން ނިންމީ މާލޭގެ އަމީނީމަގު ހެދުމުގެ ޕްރޮޖެކްޓާއި ގުޅިގެން މާފަންނުގައި ދިމާވެފައިވާ ޓްރެފިކް މައްސަލައަށް ހައްލެއް ގެނައުމަށް ކަމަށެވެ. އަދި މަގު ބަންދުކޮށްފައިވާ ސަރަހައްދު ސާފުކޮށް މަގު ހުޅުވާލުމަށް މިނިސްޓްރީގެ މުވައްޒަފުން މިއަދު މަސައްކަތް ކުރަމުން ދިޔައިރު، އެސަރަހައްދަށް މިނިސްޓަރ އާދަމް ޝަރީފް އުމަރު ވަނީ ޒިޔާރަތްކުރައްވައި މަސައްކަތް ހިނގަމުންދާ ގޮތް ބައްލަވާލައްވާފައެވެ.

އެމަގު ބަންދުކުރީ، "ރަސްފަންނު މިކްސްޑް ޔޫސް ޑިވެލޮޕްމަންޓް ސައިޓް"ގެ ނަމުގައި ރައީސް ޔާމީނުގެ ސަރުކާރުގައި އިއުލާނުކުރި، ބޮޑު ހައުސިންގ މަޝްރޫޢުގެ ބޭނުމަށް، 2018 ވަނަ އަހަރުގެ ޖުލައި މަހުގެ ތެރޭގައެވެ. 

"ރަސްފަންނު މިކްސްޑް ޔޫސް ޑިވެލޮޕްމަންޓް ސައިޓް" މަޝްރޫޢު އިފްތިތާހް ކުރުމުގެ ތެރެއިން ---

ސިންގަޕޫރުގެ ކޮރަލް ބޮލިވާޑް ޑިވެލޮޕްމަންޓް ކުންފުންޏާއި ހަވާލުކޮށްގެން ހިންގަން އުޅުނު އެމަޝްރޫޢު ފަހުން ސަރުކާރުން ބަދަލުރީ ހުޅުމާލެއަށެވެ.