މާލެ ސިޓީގެ މަގުތަކުގައި ފެންބޮޑުވާ މައްސަލަ ޙައްލުކުރުމުގެ ގޮތުން ކާނުތައް ސާފުކުރުމުގެ ޚާއްޞަ ޕްރޮގްރާމެއް ފަށައިފިއެވެ. މި ޕްރޮގްރާމް ފަށްޓަވައިދެއްވީ، ސިޓީތަކާއި އިދާރީ ދާއިރާތަކާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރެވެ.

މާލެ ސާފުކުރުމުގެ ޕްރޮގްރާމަކީ ސިޓީތަކާއި އިދާރީ ދާއިރާތަކާއި އާންމު މަސައްކަތްތަކާ ބެހޭ ވުޒާރާއާއި، މާލެ ސިޓީ ކައުންސިލާއި، ސިއްޙީ ވުޒާރާއާއި ވޭސްޓް މެނޭޖްމަންޓް ކޯޕަރޭޝަން، ވެމްކޯ ގުޅިގެން ކުރިއަށްގެންދާ ޕްރޮގްރާމެކެވެ. މިއީ މާލޭގެ ބްލޮކްވެފައިވާ ކާނުތައް ސާފުކުރުމަށް އެއް ހަފްތާގެ މުއްދަތައް ކުރިޔަށް ގެންދެވޭ ޙާއްސަ ޕްރޮގްރާމެއް ނަމަވެސް ޕްރޮގްރާމް ނިމުމަށްފަހުވެސް އާދައިގެމަތިން ކާނުތައް ސާފުކުރުމުގެ މަސައްކަތް މާލެސިޓީ ކައުންސިލުން ކުރިޔަށް ގެންދަވާނެކަމަށް އެ ކައުންސިލުން ވިދާޅުވެއެވެ.  

މި ޕްރޮގްރާމް އިފްތިތާހުކުރެއްވުމަށް ބޭއްވި ޚާއްސަ ރަސްމިއްޔާތުގައި ވާހަކަފުޅުދައްކަވަމުން ސިޓީތަކާއި އިދާރީ ދާއިރާތަކާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވީ މިދިޔަ ހޮނިހިރު ދުވަހު މާލެއަށް ކުރި ވިއްސާރަގައި ފެންބޮޑުވި އެއް ސަބަބަކީ މަގުތަކުގައި ރަނގަޅަށް ފެން ހިނދޭ އިންތިޒާމެއް ނެތުމުގެ ސަބަބުންކަމަށެވެ. އާދަމް ޝަރީފް ވިދާޅުވީ މާލޭގެ މަގުތަކުގައި ފެންބޮޑުވާ މައްސަލައަށް ހައްލެއް ގެނެސްދިނުމަށް މާލޭ ސިޓީ ކައުންސިލުން އިސްނަންގަވައިގެން، ހެލްތު މިނިސްޓްރީ އާއި އެޗްޕީއޭއާއި އަދި އެހެން ފަރާތްތަކާއި އެ ވުޒާރާ ގުޅިގެން ކުރިއަށްދާ މާލެ ސާފުކުރުމުގެ މަސައްކަތަކީ މުހިންމު އަދި މާލެއަށް ކޮންމެހެން ބޭނުންވެފައިވާ މަސައްކަތެއްކަމަށެވެ.

މި ރަސްމިއްޔާތުގައި ވާހަކަފުޅު ދައްކަވަމުން މާލެ ސިޓީގެ އެކްޓިންގ މޭޔަރ އަޙްމަދު ނަރީޝް ވިދާޅުވީ މާލޭ ސާފުކުރުމުގެ ގޮތުން ކުރިއަށް ގެންދިއުމަށް ހަމަޖެހިފައިވާ ހަރަކާތަކީ މާލޭގެ ކާނުތައް ސާފުކުރުމުގެ ގޮތުން އެއް ހަފްތާގެ މުއްދަތައް ހިންގުމަށް ހަމަޖެހިފައިވާ ޕްރޮގްރާމެއް ކަމަށެވެ.