ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރުގެ ގޮތުގައި މިހާރު ހުންނެވި، މެމްބަރު ޢަލީ ނިޔާޒް ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި، ފާދިއްޕޮޅު ކުރެންދޫ ދާއިރާއަށް ވާދަކުރެއްވުމަށް ނިންމަވާފައިވާ ކަން އިޢުލާނު ކުރައްވައިފިއެވެ.

ކުރެންދޫ ދާއިރާއަށް ކުރިމަތިލައްވާނެކަން އިޢުލާނު ކުރައްވައި، ޢަލީ ނިޔާޒު ވިދާޅުވެފައި ވަނީ،  ކުރެންދޫ، އޮޅުވެލިފުށި ރައްޔިތުންގެ ހައްޤުގަ 20 ވަނަ ރައްޔިތުން މަޖިލީހުގައި ވަކާލުތުކޮށް، ޤާނޫނުތަކަށް ގެންނަންޖެހޭ ހެޔޮ ބަދަލުތައް ގެނެސް ސަރުކާރު ޖަވާބުދާރީ ކުރުމުގައި ސާބިތު ކަމާއިއެކު ދެމިހުންނަވާނެ ކަމަށެވެ.

މީގެ އިތުރުން،  ފެހި ޤާނޫނުއަސާސީއާއިއެކު ރާއްޖެއަށް ތައާރަފްވި ގިނަ ޕާޓީ އެކުލެވޭ ވެރިކަމުގެ ނިޒާމް ގައި ވެރިކަން ހިންގާ ޕާޓީއާ އެއްވަރުގެ ޒިންމާއެއް މައި އިދިކޮޅު ޕާޓީގެ ބޮލުގައިވެސް އެޅިފައި އޮންނަކަމަށް ޤަބޫލްކުރައްވާކަމަށާއި، އެހެންވުމުން ސަރުކާރުތައް ބަދަލުވާ ކޮންމެ ފަހަރަކު އެދާއިރާގެ ރައްޔިތުން ގެ އަޣުލަބިއްޔަތުން ވަކި މުއްދަކަށް ވަކި ސިޔާސަތުތަކެއް ކުރިއެރުވުމަށް ވަކި ފިކުރަކަށް އިންތިޚާބްކުރި ރައްޔިތުންގެ މަންދޫބަކު އެގޮތުގައި ދެމި ހުންނަންޖެހޭނެކަމުގައި ދެކޭ ކަމުގައިވެސް ޢަލީ ނިޔާޒް ވިދާޅުވިއެވެ.

އެމްޑީޕީގެ ޓިކެޓްގައި ކުރެންދޫ ދާއިރާއަށް ވާދަކުރައްވާނޭކަން ހުޅުމާލެ ދާއިރާގެ މެމްބަރު ޢަލީ ނިޔާޒު އިޢުލާނު ކުރެއްވި އިރު، އެދާއިރާއަށް އެމްޑީޕީން ހޮވި މަޖިލިސް މެމްބަރު ޢަބުދުލްޣަނީ ޢަބުދުލްހަކީމް ވަނީ ޕާޓީން ވަކިވެވަޑައިގެން ވެރިކަންކުރާ ޕާޓީ ޕީއެންސީއަށް ސޮއެކުރައްވާފައެވެ. އަދި އެދާއިރާއަށް ޕީއެންސީގެ ޓިކެޓްގައި އޭނާ ވާދަކުރައްވާނޭކަން ސާފެއް ނުވެއެވެ.

18 ވަނަ ރައްޔިތުންގެ މަޖިލީހާ މިހިނގާ 19 ވަނަ ރައްޔިތުންގެ މަޖިލީހުގެ އިންތިޚާބުގައިވެސް، އެދާއިރާގެ ގޮނޑި ކާމިޔާބުކޮށްފައި ވަނީ އެމްޑީޕީގެ ޓިކެޓްގައި ނުކުތް ކެންޑިޑޭޓުންނެވެ.