ރާއްޖެ މިހާރު ދަތުރުކުރަމުން މިދަނީ ވަރަށް ނުރައްކާތެރި ދިމާލަކަށް ކަމަށާއި، އެކަން ހުއްޓުވަން ޖެހޭ ކަމުގައި، މާލޭ ސިޓީކައުންސިލްގެ މޭޔަރު ކަމުގެ މަޤާމަށް އެމްޑީޕީގެ ޓިކެޓްގައި ވާދަކުރައްވާ، އާދަމް އާޒިމް ވިދާޅުވެއްޖެއެވެ.

އާޒިމް މިހެން ވިދާޅުވީ، ފެހި ތަނަވަސް މާލެ ކެމްޕޭނުގެ ތެރެއިން ރޭ، ދަނޑިކޮށީ ޖަގަހަގައި ބޭއްވި ޖަގަހަ ޖަލްސާގައި ވާހަކަފުޅު ދައްކަވަމުންނެވެ.

އާޒިމް ވިދާޅުވީ، މިސަރުކާރު ވެރިކަމަށް އައުމަށް ދެއްކި ހުރިހާ ވާހަކަތަކަކީވެސް ދޮގުވާހަކަތަކެއްކަން މިހާރު އެދަނީ ސާބިތުވަމުން ކަމުގައެވެ. އެގޮތުން އިންޑިއާ ސިފައިންނާއި ބެހޭ ގޮތުން މިސަރުކާރުން ވެރިކަމަށް އައުމަށް ދެއްކި ވާހަކަތައް ޚާއްޞަ ގޮތެއްގައި އާޒިމް ފާހަގަކުރެއްވިއެވެ.

މިސަރުކާރުގެ އެންމެ ބޮޑު ބޯހިޔާވަހިކަމުގެ މަޝްރޫޢުކަމުުގައިވާ ފުށި ދިއްގަރުފަޅު މަޝްރޫޢަށް އިޝާރާތްކުރައްވައި، އާޒިމް ވިދާޅުވީ، އެމަޝްރޫޢަކީ، އިސްރާފަކަށް ވެގެންދާ މަންޒަރު ފެންނަ ކަމަށެވެ. އަދި އެމަޝްރޫޢުގެ ތެރެއިންވެސް އަޑިނޭނގޭ ކަންތައްތަކެއް ހިނގަމުންދާކަމަށާއި އެކަންކަމަށް ލޯމަރާލައިގެން ތިބެވެން ނެތްކަމަށްވެސް އާޒިމް ފާހަގަކުރެއްވިއެވެ.

އާޒިމް ވިދާޅުވީ ފުށީ ދިއްގަރުފަޅު ހިއްކުމުގެ މަޝްރޫޢަކީ އެމްޓީސީސީއަށް ކުރެވޭނެ ވަރުގެ މަސައްކަތެއް ކަމަށާއި އެމަސައްކަތް އެމްޓީސީސީއަށް 5 ބިލިއަން ރުފިޔާއަށް ކޮށްދެވޭނެ ކަމަށެވެ. އެހެން ނަމަވެސް ފުށިދިއްގަރުފަޅު ހިއްކުމުގެ މަޝްރޫޢަށް 10 ބިލިއަން ރުފިޔާ ޚަރަދުވާނެ ކަމުގައި މިސަރުކާރުން ބުނާއި އިރު އޭގައި ވިސްނާލަން ޖެހޭ ކަންތައްތަކެއް އެބަހުރި ކަމުގައި އާޒިމް ވިދާޅުވިއެވެ.

އާޒިމް ވިދާޅުވީ، މިސަރުކާރަކީ ދޮގާއި މަކަރުން އުފަންވި ސަރުކާރެއް ކަމަށާއި، ރައްޔިތުންގެ މަޖިލީހުގެ ތެރެއިންވެސް ސަރުކާރު ހުއްޓުވަން ޖެހޭނެ ކަމަށެވެ.