ފ. ނިލަންދޫ އެއާޕޯޓް އެޅުމަށް އީއައިއޭ ހެދުމާއި ސާވޭ ކުރުމުގެ މަސައްކަތް އެމްޓީސީސީއާ ހަވާލުކޮށްފިއެވެ.

މިމަސައްކަތް ހަވާލުކޮށް އެއްބަސްވުމުގައި ސޮއެކުރުމުގެ ރަސްމިއްޔާތު ބާއްވާފައި ވަނީ މިއަދު ދިވެހިރާއްޖޭގެ އަޑުގެ ސެނެކޯމާލަމްގައެވެ. 

އެއްބަސްވުމުގައި، އެމްޑީސީސީގެ ފަރާތުން ސޮއެކުރެއްވީ އެކުންފުނީގެ މެނޭޖިން ޑައިރެކްޓަރ ޢަބުދުﷲ ޒިޔާދެވެ. އަދި ކޮންސްޓްރަކްޝަން މިނިސްޓްރީގެ ފަރާތުން ސޮއެކުރެއްވީ ކޮންސްޓްރަކްޝަން މިނިސްޓްރީގެ ސްޓޭޓް މިނިސްޓަރ އިބްރާހިމް ތޮއާމްއެވެ.

މިއެއްބަސްވުމުގައި ސޮއެކުރުމުގެ ރަސްމިއްޔާތަށްފަހުގައި މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. ޢަބްދުﷲ މުއްޠަލިބް ވިދާޅުވީ، ފ. ނިލަންދޫ އެއާޕޯތްގެ މަސައްކަތަކީ މިއަހަރަށް ސަރުކާރުން ބަޖެޓްކޮށްފައިވާ މަޝްރޫޢެއް ކަމަށެވެ. މިގޮތުން މިއަހަރުގެ ބަޖެޓުގައި ހިމަނާފައިވަނީ ނިލަންދޫ އެއާޕޯޓު އެޅުމަށް ބޭނުންވާ ބިން ހިއްކުން ކަމުގައި މިނިސްޓަރ ވިދާޅުވިއެވެ.

މިނިސްޓަރ މުއްޠަލިބު ވިދާޅުވީ، އެމަސައްކަތް 120 ދުވަހުގެ ތެރޭގައި ނިންމުމަށް ހަވާލު ކުރެވުނު ނަމަވެސް އެއަށް ވުރެ އަވަހަށް، ނިމިއްޖެކަމުގައި ވާނަމަ، އެއާޕޯޓު އެޅުމުގެ ކޮންޓްރެކްޓްގައި ސޮއެކުރެވި، ޢަމަލީ މަސައްކަތްވެސް ވީހާ އަވަހަކަށް ފެށިގެންދާނެ ކަމަށެވެ.

ފ. ނިލަންދޫގައި އެއާޕޯޓެއް އެޅުމުގެ ޕްލޭނެއް އެންމެ ފުރަތަމަ ޢިއުލާނުކުރީ ރައީސް ޔާމީނުގެ ސަރުކާރުގައެވެ. އެހެން ނަމަވެސް އެކަމާއި ގުޅޭ ގޮތުން ޢަމަލީ ގޮތުން އެއްވެސް މަސައްކަތެއް އެސަރުކާރުގައި ކުރެވިފައެއް ނުވެއެވެ. 

ނިލަންދޫގައި އެއާޕޯޓެއް އެެޅުމަށް މިސަރުކާރުން ނިންމާފައި ވާއިރު، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހްގެ ސަރުކާރުން ވަނީ، ފ. މަގޫދޫފައި އެއާޕޯޓެއް އަޅާފައެވެ. އަދި އެއާޕޯޓުގެ މަސައްކަތް މިހާރު އޮތީ މުޅިން ނިމުމަކާއި ހަމައަށް ގޮސްފައެވެ. ސަރުކާރު ބަދަލުވުމަށްފަހުގައި ކަނޑައެޅިފައި އޮތް ޕްލޭނާއި އެއްގޮތަށް މަސައްކަތް ދިޔަ ނަމަ މިޖެނުއަރީ މަހުގެ ތެރޭގައި މަގޫދޫ އެއާޕޯޓަށް، ޓެސްޓް ފްލައިޓްތައް ޖައްސަން ފެށޭނެއެވެ.

މަގޫދޫ އެއާޕޯޓުގެ މަސައްކަތްވެސް ސަރުކާރުް ހަވާލުކޮށްފައި އޮތީ އެމްޓީސީސީއާއެވެ. ފ. ނިލަންދޫގައި އެއާޕޯޓެއް އެޅުމަށް މިސަރުކާރުން ނިންމައި މަސައްކަތް ފަށާފައި ވާއިރު، މަގޫދޫ އެއާޕޯޓާއި ނިލަންދޫ އާއި ދެމެދުގެ ދުރުމިނަކީ، 5.23 މޭލެވެ. އެއީ އާދައިގެ ސްޕީޑް ލޯންޗެއްގައި ނަމަ 8 މިނިޓްގެ ދަތުރެކެވެ.