ތުޅާދޫ ދާއިރާގެ މެންބަރު ހިސާން ހުސެއިން ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ވާދަނުކުރައްވަން ނިންމަވައިފިއެވެ. 

ޖުޑީޝަލް ސާވިސަސް ކޮމިޝަން (ޖޭއެސްސީ)ގައި ރައްޔިތުން މަޖިލިސް ތަމްސީލު ކުރައްވާ މެންބަރެއްގެ ގޮތުގައި އިންނަވާ އަދި އެ ކޮމިޝަންގެ ރައީސްކަން ވެސް ކުރައްވާ ހިސާން އެކަން ހާމަކުރެއްވީ އެކްސްގައި ކުރެއްވި ޕޯސްޓެއްގައެވެ.

އެ ޕޯސްޓްގައި އޭނާ ވަނީ މަޖިލީހުގައި ތުޅާދޫ ދާއިރާ ތަމްސީލް ކުރުމަށް އޭނާއަށް ދާއިރާގެ ރައްޔިތުން ދެއްވި ފުރުސަތާއި ތާއީދާއި އެއްބާރުލެއްވުމަށް ޝުކުރު އަދާކުރައްވައިފައެވެ. މީގެއިތުރުން އޭނާ މެންބަރުކަމުގެ މަސްއޫލިއްޔަތު އަދާކުރެއްވުމުގައި އާއިލާ އާއި ސަޕޯޓަރުންނާއި އޭނާގެ ޓީމްގެ ފަރާތުން ލިބުނު އެއްބާރުލުމަށް ވަނީ ޝުކުރު އަދާކުރައްވާފައެވެ.

"2024 ވަނަ އަހަރުގެ ރައްޔިތުންގެ މަޖިލީހަށް އަޅުގަނޑު ކުރިމަތި ނުލާން ނިންމާފައިވާކަމުގައި ދަންނަވަން. އުންމީދަކީ މާތް اللهގެ ވާގިފުޅާއެކު އަބަދު ވެސް ރައްޔިޔުންނަށް ހިދުމަތްކުރުމުގައި ދެމިހުރުން،" ހިސާންގެ ޕޯސްޓްގައި ވެއެވެ.

މަޖިލީހަށް ވާދަނުކުރެއްވިޔަސް އެމްޑީޕީއާ އެކު ދެމި ހުންނަވާނޭ ކަމަށް ހިސާން ވަނީ ވިދާޅުވެފައެވެ.