މިދިޔަ އާދިއްތަ ދުވަހު ރާއްޖެއަށް ކުރި ވިއްސާރައިގައި ހުޅުމާލެ ސަހަރާގައި ފެންބޮޑުވުމުގެ ސަބަބުން މީހުން ވަޅުލުމުގެ ކަންކަން އާ ސަހަރާއަށް ވަގުތީގޮތުން ބަދަލުކޮށްފިއެވެ.

މާލެ ސިޓީ ކައުންސިލުން ވިދާޅުވީ، މީހުން ވަޅުލުމަށްޓަކައި ތިން ފޫޓަށް ވަޅު ކޮންނަން ޖެހޭއިރު ވިއްސާރަ އަށް ފަހު ހުޅުމާލެ ސަހަރާހައި އެއް ފޫޓަށް ވަޅު ކޮންނައިރަށް ފެން އަރާ ކަމަށެވެ.

އެ މައްސަލަ ހައްލުވާން އަދި ހަފުތާއެއް ނަގާނެތީ، މާލެ އާއި ވިލިމާލެ އަދި ހުޅުމާލޭގައި މަރުވާ މީހުން މިދިޔަ ހޯމަ ދުވަހުން ފެށިގެން ވަޅުލަނީ އާ ސަރަހާގައި ކަމަށް ސިޓީ ކައުންސިލުން ވަނީ ވިދާޅުވެފައެވެ. އެހެނަމަވެސް މައްޔިތާގެ މޫނު ދެއްކުން އޮންނާނީ ހުޅުމާލެ ސަހަރާގައެވެ.

މޫސުން ރަނގަޅުވެ ފެންގަނޑު ހިނދުމުން މީހުން ވަޅުލުމުގެ ކަންކަން އަނެއްކާވެސް ހުޅުމާލެ ސަހަރާއަށް ބަދަލުކުރެވޭނެކަމަށް ސިޓީ ކައުންސިލުން ވަނީ ބުނެފައެވެ. މީހުން ވަޅުލުމުގެ ކަންކަން އާ ސަހަރާގައި ކުރިން ކުރި ނަމަވެސް އެތަން މަރާމާތައް ބަންދުކުރުމަށްފަހު މީހުން ވަޅުލުމުގެ ކަންކަން މިދިޔަ އަހަރު ވަނީ ހުޅުމާލެ ސަހަރާއަށް ބަދަލުކޮށްފައެވެ.

މާލެ ސަރަހައްދަށް މިދިޔަ ހޮނިހިރު ދުވަހު ވަނީ ރެކޯޑު އަދަދަކަށް ވާރޭ ވެހިފައެވެ. މީގެ ސަބަބުން މާލޭގެ އެކި ސަރަހައްދުތަކުގައި ފެންބޮޑުވެ ބައެއް ގެތަކަށްވެސް ވަނީ އެކިވަރުގެ ގެއްލުން ވެފައެވެ.