ހައްދު ފަހަނައެޅި ސަޙްޔޫނީ ދައުލަތް އިޒްރާއީލުން، ލުބުނާންގެ ވެރިރަށް ބެއިރޫތުގައި ހުންނަ ހަމާސްގެ އޮފީސް ހުންނަ އިމާރާތަށް ޑްރޯން ހަމަލާއެއްދީ، ހަމާސްގެ އިސްލީޑަރަކާއި، އިތުރު ހަތަރު މީހަކު ޝަހީދުކޮށްލައިފިއެވެ.

ލުބުނާނުގެ ސިޔާދަތީ ސަރަހައްދުގެ ތެރެއަށް، ބައިނަލްއަޤުވާމީ ޤާނޫނުތަކާއި ޚިލާފަށް އިޒްރާއީލުން މިހަމަލާދީފައި ވަނީ، ބޭރު ޤައުމުތަކުގައި ތިބި ހަމާސްގެ އިސްލީޑަރުންނަށް ހަމަލާތައް ދޭނެކަމުގެ އިންޒާރުތައް ދިނުމަށްފަހުގައެވެ.

އިޒްރާއީލުން ދިން ހަމަލާގައި ޝަހީދުކޮށްލާފައި ވަނީ ޙަމާސްގެ ދެވަނައަށް އެންމެ އިސް ލީޑަރުންގެ ތެރޭގައި ހިމެނޭ، ސާލިހް އަލް އަރޫރީއެވެ. އަރޫރީއަކީ، ހަމާސްގެ އަސްކަރީ ގޮފި، ޤައްސާމް ބްރިގޭޑްސް އުފެއްދުމުގައި އިސްކޮށް މަސައްކަތްކުރެއްވި، އަދި ހަމާސްގެ އަސްކަރީ ކަންކަން ރާވައި ހިންގުމުގައި ބައިވެރިވެވަޑައިގެންނެވި ބޭފުޅެކެވެ.

Advertisement

މިއީ އިޒްރާއީލުން ޣައްޒާއާ ދެކޮޅަށް އިޒްރާއީލުން ފެށި ހަނގުރާމައިގެ ތެރޭގައި، އިޒްރޭލުން ބެއިރޫތަށް ހަމަލާދިން ފުރަތަމަ ފަހަރެވެ. އަދި އިޒްރޭލުގެ މަޤުޞަދަކީ، ލުބުނާނުގެ ހަނގުރާމައިގެ ތެރެއަށް ރަސްމީކޯށް ވެއްދުންތަކުގައި، ލުބުނާނު ސަރުކާރުން އެ ހަމަލާކުއްވެރިކުރުމަށްފަހު ވަނީ ބުނެފައެވެ.

އިޒްރާއީލުގެ ދެކުނުގެ ސަރަހައްދުތަކަށް ހަމާސްގެ މުޖާހިދުން އޮކްޓޫބަރު 7 ވަނަ ދުވަހު ދިން ހަމަލާތަކާއި ގުޅިގެން އިޒްރޭލުން މުޅި ޣައްޒާ ދަނީ ފުނޑުފުނޑުކޮށްލަމުންނެވެ. މިހާތަނަށް އިޒްރާއީލުން ޣައްޒާއަށްދިން ހަމަލާތަކުގައި ޝަހީދުވި ފަލަސްޠީނުގެ މީހުންގެ އަދަދު ވަނީ، ބާވީސް ހާހަށް އަރާފައެވެ.