މާލޭ ސިޓީގެ މޭޔަރުކަމުގެ މަްަޤާމަށް ވާދަކުރައްވަމުން ގެންދަވާ، ސަރުކާރު ކެންޑިޑޭޓް ކުރީގެ ބަންޑާރަ ނައިބު އަލްއުސްތާޛާ ޢާޢިޝަތު އާޒިމާ ޝަކޫރުގެ މައްޗަށް އިއްޔެ ސިވިލްކޯޓުން އިއްވި ޙުކުމަކީ، ޒާތީ ހަމަލާއެއްގެ ގޮތުގައި އާޒިމާ ސިފަކުރައްވައިފިއެވެ.

އާޒިމާގެ މޯލްޑިވުސް އިސްލާމިކް ބޭންކުން 2016 ވަނަ އަހަރު، ޑިމިނިޝިން މުޝާރަކް ޕްރޮޕަޓީ ފައިނޭންސިންގ ފެސިލިޓީގެ ދަށުން ނަގާފައިވާ، 3.1 މިލިޔަން ރުފިޔާ ޤަވާއިދުން ދައްކަމުން ނުދާތީ، ލޯނުގެ ، ޖޫރިމަނާ އާއި ޗެރިޓީގެ ގޮތުގައި ދައްކަންޖެހޭ ޖުމުލަ، 4.15 މިލިޔަން ރުފިޔާ، 6 މަސްދުވަހަށް ބަހާލައިގެން ޖުލައި 2024ގެ ކުރިން ދައްކައި ޚަލާސް ކުރުމަށެވެ.

އެމައްސަލައިގެ ޙުކުމް އިއްވުމަށް ބޭއްވި ޝަރީޢަތުގެ މަޖިލިސް އިއްޔެ ސިވިލްކޯޓުގައި އޮތް އިރު އެމައްސަލައިގެ ޝަރީއަތުގެ މަޖިލީހަަށް އާޒިމާ ހާޟިރުވެ ވަޑައިގެންފައެއް ނުވެއެވެ.

ސިވިލްކޯޓުގެ ޙުކުމާއި ގުޅިގެން އާޒިމާ ނެރުއްވި ބަޔާނުގައި ވިދާޅުވީ، އެކަމަނާއަށް އާމްދަނީ ލިބެމުން ދިޔައިރު ޤަވާއިދުން އެލޯނު ދައްކަމުން ގެންދިޔަ ކަމަށާއި، އެހެން ނަމަވެސް ފަހުން ލޯނު ނުދެއްކުނީ، އޭނާއާއި ދެކޮޅަށް ކުރީގެ ސަރުކާރުން އުފުލި ދައުވާތަކާއި އެކު އާމްދަނީ ހޯދުމަށް އެނާ ކުރަމުން އައި ޤާނޫނީ މަސައްކަތްތަކަށް ހުރަސް އެޅުމުންނާއި އަދި ރާއްޖެއިން ބޭރުން ލިބުނު ވަޒީފާގެ ފުރުޞަތު އެކަންކަމުގެ ސަބަބުން ބަންދުވެގެން ދިޔުމުގެ ސަބަބުންނެވެ.

އާޒިމާ ވިދާޅުވީ، އޭނާއަކީ ދައުލަތުގެ ބާރުގަދަ މަޤާމުތަކެއް ފުރުއްވި ބޭފުޅެއް ނަމަވެސް، އެކަމަނާއަށް ދައުލަތުން ލިބިވަޑައިގެންނެވި މުސާރަފުޅު ފިޔަވައި އެހެން އެއްވެސް އެއްޗެއްގައި އަތްޕުޅުލައްވާފައި ނުވާނެ ކަމަށެވެ.

އާޒިމާ ވިދާޅުވީ، އިސްލާމިކް ބޭންކަށް ދައްކަންޖެހޭ ފައިސާ ދެއްކުމަށް، އިސްވެ ތާވަލެއް އެކުލަވާލައްވައި، ލޯނު ރީސްޓްރަކްޗަރ ކުރެއްވުމަށް ބޭންކަން ހުށައަޅުއްވާފައިވާ ކަމަށެވެ. އަދި ރީސްޓްރަކްޗަރ ކުރުމުގެ މަޝްވަރާތައް ބޭންކާއި އެކު ކުރިޔަށް ދިޔައީ ޑިސެމްބަރު މިނިމުނު ޑިސެމްބަރު މަހުވެސް ކުރިޔަށް ދިޔަ ކަމަށާއި، އަދި އެގޮތަށް މަސައްކަތް ކުރަނިކޮށް އެޙުކުމް އެގޮތަށް އައުމުން، މައްސަަލަ ރިވިއު ކުރުމަށާއި، އިސްތިއުނާފް ކުރުމަށް ނިންމާފައިވާ ކަމުގައި އާޒިމާ ވަނީ ވިދާޅުވެފައެވެ.