އިނގިރޭސިވިލާތުގެ "ޗެމްޕިއަންޝިޕް" ނުވަތަ ދެވަނަ ޑިވިޝަނުގައި ވާދަކުރަމުން އަންނަ ބާމިންގްހަމް ސިޓީއަށް ކޯޗުކޮށްދެމުން އަންނަ ވޭން ރޫނީ އޭނާގެ ވަޒީފާއިން ވަކިކޮށްފިއެވެ.

މިކަން އިއުލާން ކުރުމަށް އެ ކުލަބުން ނެރުނު ބަޔާނެއްގައި ބުނެފައިވާގޮތުން، ރޫނީއާއެކު އެ ޓީމުން ކުރި އުއްމީދުތަކާ އެއްގޮތަށް ކަންތައްތައް ކުރިޔަށް ގޮސްފައިނުވާތީ، ކުލަބަށް އެންމެ ފައިދާ ހުރި ގޮތަކީ ކުލަބުގެ މެނޭޖުމެންޓް ބަދަލުކުރުމެވެ.

ކުލަބުން ނެރުނު ބަޔާނުގައި އިތުރަށް ބުނެފައިވާ ގޮތުން، އައު ކޯޗެއް ހޯދުމުގެ މަސައްކަތް މިހާރުވަނީ އެ ކުލަބުން ފަށާފައެވެ.

މީގެ 83 ދުވަސް ކުރިން ބާމިންގްހަމް ސިޓީގެ ކޯޗަކަށް ރޫނީ އައްޔަން ކުރިފަހުން، އޭނާގެ އިރުޝާދުގެ ދަށުން އެ ޓީމު ކުޅުނު 15 މެޗުގެ ތެރެއިން 9 މެޗުން ވަނީ ބަލިވެފައެވެ.

ރޫނީގެ ވަޒީފާ މި ގެއްލުނީ، ރޭގައި ލީޑްސް ޔުނައިޓެޑާ ބައްދަލުކުރި މެޗުން 3-0 އިން ބަލިވެފައި ވަނިކޮށެވެ. މި ނަތީޖާއާއެކީ ގިނަ ސަޕޯޓަރުންތަކެއް ވަނީ ނުރުހުން ވެސް ފާޅުކޮށްފައެވެ.

ރޫނީގެ ކޯޗިން ކެރިއަރު ފަށާފައިވަނީ 2020 ވަނަ އަހަރު ޑާބީ ކައުންޓީއިންނެވެ. އެ ކުލަބުގައި ފުރަތަމަ ދުވަސްކޮޅު ރަގަޅު ނަތީޖާތަކެއް ނެރެވުނު ނަމަވެސް، ޓީމުގެ ކުޅުން ފަހުން ވަރަށް ބޮޑުތަން ދަށްވެގެން ދިޔައެވެ. އަދި ޖެހިގެން އައި ސީޒަންގައި އެ ޓީމު ވަނީ "ލީގު ވަން" ނުވަތަ އެ ގައުމުގެ ތިން ވަނަ ޑިވިޝަނަށް ރެލިގޭޓްވެފައެވެ.

އެއަށްފަހު 2022 ވަނަ އަހަރު އޭނާ ހަވާލުވެފައިވަނީ އެމެރިކާގެ ކްލަބެއް ކަމުގައިވާ ޑީސީ ޔުނައިޓެޑާއެވެ. ރޫނީއާއެކު އެ ޓީމަށް 14 މެޗުން ހޯދުނީ 9 ޕޮއިންޓެވެ. އަދި އެ ޓީމަށް ލީގު ނިންމާލަން ޖެހުނީ ފުލުގައެވެ.

އެއަށްފަހު ރޫނީ ބާމިންގްހަމް ސިޓީއާއި ހަވާލުވެފައިވަނީ 2023 ވަނަ އަހަރުގެ އޮކްޓޯބަރު މަހުއެވެ.