ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވެރިކަމަށް ވަޑައިގެންނެވުމަށް ކެމްޕެއިން ކުރެއްވެވިއިރު، އެ މަނިކުފާނު ރައްޔިތުންނަށް ވެ ވަޑައިގެންނެވި އެންމެ މުހިންމު އެއް ވައުދަކީ، ދިވެހިރާއްޖެއާއި ޗާގޯސް އާކިޕެލާގޯއާ ދެމެދު ކަނޑުގެ އިން ވަކިކުރުމާ ގުޅޭ މައްސަލައާ ގުޅޭގޮތުން ވެ ވަޑައިގެންނެވި ވައުދުފުޅެކެވެ. އެ މަނިކުފާނު ވިދާޅުވެފައިވަނީ، އެ މައްސަލާގައި އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އިން ނިންމާފައިވާ ނިންމުމަކީ ސައްހަ ނިންމުމެއް ނޫންކަމާއި، އެ ނިންމުމާ ގުޅިގެން ރާއްޖޭގެ ކަނޑުގެ ސަރަހައްދުން ބައެއް ގެއްލިފައިވާ ކަމަށެވެ.

އެގޮތުން، 31 ޑިސެމްބަރ 2023 ވަނަ ދުވަހު އޮތް ވަޒީރުންގެ މަޖިލީހުގެ ނިންމެވުންތައް ހާމަ ކުރެވުމަށް މިއަދު ބޭއްވެވި ނޫސްވެރިންގެ ބައްދަލުވުމުގައި، ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުﷲ ނާޒިމް އިބްރާހިމް ވަނީ، އެ މައްސަލަ އިޓްލޮސްގައި އިސްތިއުނާފު ކުރުމަށް ކުރަމުންދާ މަސައްކަތްތަކުގެ އަދާހަމަ ހިއްސާ ކުރައްވާފައެވެ.

އެ މައްސަލަ ކުރިޔަށް ގެންދިއުމަށް ހާއްސަ ކޮމެޓީއެއް އެކުލަވާލާފައިވާކަމާއި، އެ ކޮމެޓީގައި އެޓާނީ ޖެނެރަލް އޮފީހުގެ ވަކީލުންނާއި، ފޮރިން މިނިސްޓްރީ އާއި ޑިފެންސް މިނިސްޓްރީގެ ބައިވެރިވުން ހިމެނޭކަމަށް ނާޒިމް ފާހަގަ ކުރެއްވެވިއެވެ. މި ކޮމެޓީ ލީޑު ކުރާނީ އެޓާނީ ޖެނެރަލް އޮފީހުން ކަނޑައަޅުއްވާފައިވާ ފަރާތަކުންނެވެ.

އަދި މި މައްސަލަ ކާމިޔާބުކުރުމަށް އެހީތެރިވުމުގެ ގޮތުން ރާއްޖެއިން ބޭރުގެ ދެ މާހިރަކު އައްޔަންކޮށްފައިވާކަމަށް މިއަދުގެ ޕްރެސްގައި ނާޒިމް ވިދާޅުވިއެވެ. އެގޮތުން، މި މައްސަލައިގައި ދިވެހި ދައުލަތާއެކު މަސައްކަތް ކުރައްވާނީ، ޔޫކޭގެ ކިންގްސް ކައުންސިލްގެ ބޭފުޅަކާއި މޯލްޓާގެ ލޯ އޮފް ދަ ސީ ޕްރޮފެސަރ އެކެވެ.

މީގެ އިތުރުން، މޯލްޓާގެ ޕްރޮފެސަރ މި މަހު ރާއްޖެ ވަޑައިގަންނަވާ، އެ ބޭފުޅާ މި މައްސަލައާ ގުޅޭގޮތުން ތައްޔާރުކޮށްފައިވާ ރިޕޯޓް، މި މަހުގެ މެދުތެރޭގައި ކެބިނެޓަށް ހުށަހަޅުއްވާނެކަމަށް ފާހަގަ ކުރެއްވެވިއެވެ. އަދި ޔޫކޭގެ ކިންގްސް ކައުންސިލްގެ ރިޕޯޓު ލިބޭނީ މި އަންނަ ފެބުރުވަރީ މަހުކަމަށް ވެސް ވިދާޅުވިއެވެ.

މިއަދު ބޭއްވެވި ނޫސްވެރިންގެ ބައްދަލުވުމުގައި، ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުﷲ ނާޒިމް އިބްރާހިމް

މި ރިޕޯޓުތަކަށް ރިއާޔަތްކޮށް، މި މައްސަލައިގެ ފައިނަލް ރިޕޯޓެއް ކެބިނެޓަށް ހުށަހެޅުމަށް ހަމަޖެހިފައިވަނީ މި އަންނަ ފެބުރުވަރީ މަހުއެވެ.

އިނގިރޭސިވިލާތުގެ ކިންގްސް ކައުންސިލަރުންނަކީ، ވަކި ޝަރުތުތަކެއް ފުރިހަމަވުމުން، އެގައުމުގެ ރަސްގެފާނު ކަނޑައަޅާ ވަކި ދަރަޖައެއްގެ ގާނޫނީ ލަފާދޭ ބައެކެވެ. އާންމު ގޮތެއްގައި މި ބޭފުޅުން މަސައްކަތް ކުރައްވާނީ، ބޮޑެތި އަދި އުނދަގޫ ގާނޫނީ މައްސަލަތަކުގައެވެ.