ޤާނޫނުގައި ބުނާއަދަދަށް މެމްބަރުން ހަމަކުރުމަށް، ދިން 3 މަސްދުވަހުގެ މުއްދަތުގައި 3000 މެންބަރުން ހަމަވެފައި ނުވާތީ މޯލްޑިވްސް ރިފޯމް މޫވްމަންޓް (MRM)އުވާލުމަށް އިލެކްޝަންސް ކޮމިޝަނުން ނިންމައިފިއެވެ.

އިލެކްޝަންސް ކޮމިޝަނުން ބުނީ އެޕާޓީ އުވާލުމަށް ނިންމުމުގެ އިތުރުން، މިއަދުން ފެށިގެން އެއްވެސް ސިޔާސީ ހަރަކާތެއް ނުހިންގުމަށް އެޕާޓީއަށް އެންގުމަށްވެސް ކޮމިޝަނުން ނިންމައި އެކަން އަންގާފައިވާ ކަމަށެވެ.

އެމްއާރްއެމް އުވާލުމަށް ނިންމާފައިވާކަން ރައީސް މައުމޫނާއި އެމަނިކުފާނުގެ ދަރިކަލުން ފާރިޝް މައުމޫނުވެސް ވަނީ ކަށަވަރުކޮށްދެއްވާފައެވެ.

އަދި އެކަމާއި ގުޅިގެން އެމްއާރްއެމްގެ އިސް ފަރާތްތަކުން ބައްދަލުކޮށް މަޝްވަރާކޮށް ވަނީ، ނޫސްވެރިންގެ ބައްދަލުވުމެއްވެސް ބާއްވާފައެވެ.

ރައީސް މައުމޫނު އިސްވެ ހުންނަވައި ތިންޕާޓީއެއް އުފެއްދެވިއެވެ. އެމަނިކުފާނު އެންމެ ފުރަތަމަ އުފެއްދެވިޕާޓީއަކީ، 2005 ވަނަ އަހަރު އުފެއްދެވި ދިވެހި ރައްޔިތުންގެ ޕާޓީއެވެ. ރައީސް މައުމޫނަށް 2008 ވަނަ އަހަރުގެ ރިޔާސީ އިންތިޚާބުގައި ނާކާމިޔާބުވެވަޑައިގެންނެވުމަށް ފަހުގައި، އެޕާޓީގެ ތެރޭގައި ހަމަނުޖެހުން ބޮޑުވެ ޒެޑް ޑިއާރްޕީގެ ނަމުގައި ވަކިފެކްޝަނެއް ހިންގެވުމަށްފަހު ފަހުން ރައީސް މައުމޫނު އިސްވެ ހުންނަވައި އުފެއްދެވީ، ޕްރޮގްރެސިވް ޕާޓީ އޮފް މޯލްޑިވުސް ޕީޕީއެމްއެވެ. ކޮއްކޯފުޅު ޔާމީނަށް 2013ގެ ވެރިކަން ހޯއްދަވައި ދެއްވުމުން، ރައީސް މައުމޫނުގެ އަތްޕުޅުން ޕާޓީ އަތުލެއްވީ ރައީސް ޔާމީނެވެ. ރައީސް މައުމޫނު އިސްވެ ހުންނަވައި، އެމްއާރްއެމް އުފެއްދެވީ މައުމޫން ރިފޯމް މޫވްމެންޓްގެ ނަމުގައި ސިޔާސީ ހަރަކާތެއް ހިންގެވުމަށްފަހުގައި 2019 ވަނަ އަހަރުގައެވެ.