ރާއްޖޭގައި ތިބި އިންޑިއާ ސިފައިންގެ އަދަދުކަމުގައި ސަރުކާރުން ހާމަކުރަމުން އަންނަ އަދަދު އަނެއްކާވެސް ބަދަލުވެއްޖެއެވެ.

ވަޒީރުންގެ މަޖިލީހުގެ ނިންމުންތަކާއި ގުޅޭ ގޮތުން މީޑިއާއަށް މައުލޫމާތ ދެއްވުމަށް ބޭއްވި ބައްދަލުވުމުގައި، އެއޮފީހުގެ ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް ވިދާޅުވީ، ރާއްޖޭގައި މިހާރު ތިބީ 88 އިންޑިއާ ސިފައިން ކަމަށެވެ.

އަދި އިންޑިއާ ސިފައިން ފޮނުވާލުމާއި ގުޅޭ ގޮތުން ކުރެވެމުން އަންނަކަންކަމުގެ ތަފްސީލްތައް ރައީސުލްޖުމްހޫރިއްޔާ 31 ޑިސެމްބަރު 2023 ގައި އޮތް ވަޒީރުންގެ މަޖިލީހުގެ ޖަލްސާގައި، ވަޒީރުންނާއި ޙިއްޞާކުރެއްވި ކަމުގައިވެސް ނާޒިމް ވިދާޅުވިއެވެ.

އެންމެ ފުރަތަމަ ސަރުކާރުން ހާމަކުރީ، ރާއްޖޭގައި ތިބީ 79 އިންޑިއާ ސިފައިން ކަމަށެވެ. އޭގެ ފަހުން ރާއްޖޭގައި ތިބީ 89 އިންޑިއާ ސިފައިންކަމުގައި ސަރުކާރުން ބުންޏެވެ. ރައީސުލްޖުމްހޫރިއްޔާގެ އޮފީހުގެ ތަރުޖަމާނު ކަމުގެ މަޤާމުން ޑިސެމްބަރު މަހުގެ 31 ވަނަ ދުވަހު ވަކިކުރެއްވި މުޙައްމަދު ޝަހީބު އެންމެފަހުން ބޭއްވި ނޫސްވެރިންގެ ބައްދަލުވުމުގައި ވިދާޅުވެފައި ވަނީ ރާއްޖޭގައި ތިބި އިންޑިއާ ސިފައިންގެ ކަށަވަރު އަދަދެއް އެނގިވަޑައި ނުގަންނަވާ ކަމަށެވެ.

ރާއްޖޭގައި ތިބި އިންޑިއާ ސިފައިންގެ އަދަދަކީ 88 ކަމުގައި ނާޒިމް ވިދާޅުވުން ކުރިން ސަރުކާރުން ހާމަކުރި އަދަދަށްވުރެ އެކަކު މަދުވީ ކީއްވެތޯ ނޫސްވެރިން ދެންނެވި ސުވާލަށް ނާޒިމް ސާފު ޖަވާބެއް ނުދެއްވައެވެ. އަދި ރާއްޖޭގައި ތިބި އިނޑިއާ ސިފައިން މިހާރު ކުރަމުން އަންނަނީ ކޮންކަމެއްތޯ ސުވާލުކުރެއްވުމުން އެސުވާލަށްވެސް ނާޒިމް ޖަވާބެއް ނުދެއްވައެވެ.

ރާއްޖޭގައި ތިބި އިންޑިއާސިފައިން އަނބުރާ އެޤައުމަށް ފޮނުވާ ލެއްވުމަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ.