ޖަޕާނަށް ވަރަށް ބާރުގަދަ ބިންހެލުމެއް އައިސް ސުނާމީގެ އިންޒާރު ނެރެފިއެވެ.

ޔޫއެސްޖިއޮލޮޖިކަލްސާރވޭ އިން ބުނީ، ބިންހެލުން ރެކޯޑް ކުރެވިފައިވަނީ ރިކްޓަރ ސްކޭލްއިން 7.5 މެގްނިޓިޓީއުޑްގައި ކަމަށެވެ. އެހެން ނަމަވެސް ބިންހެލުމުގެ ބާރުމިން އެއަށްވުރެވެސް މަތިވާނެ ކަމަށް ވަނީ ލަފާކޮށްފައެވެ. ބިންހެލުމަށްފަހުވެސް އެސަރަހައްދަށް ދަނީ ބާރުގަދަ ލޮޅުންތައް އަރަމުން ކަމުގައި ޔޫއެސްޖިއޮލޮޖިކަލްސާރވޭއިން ވަނީ ބުނެފައެވެ.

މިބިންހެލުން އައިސްފައި ވަނީ، ޖަޕާނުގެ ގަޑިން ހެނދުނު 11:10ގައި، ރާއްޖޭގަޑިން މެންދުރު 12:10 ގައެވެ. ބިންހެލުން އައިސްފައި ވަނީ ޖަޕާނުގެ ރަށެއް ކަމުގައިވާ، އަނަމިޒޫގެ އިރު އުތުރުން 42 ކިލޯމީޓަރު ދުރަށެވެ. 

ޖަޕާނުގެ ހުޅަނގު އައްސޭރިއަށް އައި މި ބާރުގަދަ ބިންހެލުމާއި އެކު އުފެދުނު ސުނާމީގައި ލިބުނު ގެއްލުންތަކެއް އަދި ނޭނގެއެވެ. އެހެންނަވެސް 7.5ގެ ބާރުމިނުގައި އައި ބާރުގަދަ ބިންހެލުމަކަށް ފަހު، 5.0އަށް ވުރެ ބާރުގަދަ ހަތަރުލޮޅުން މިހާރުވެސް ވަނީ އަރާފައެވެ.

2011 ވަނަ އަހަރުގެ މާރިޗުމަހު، ޖަޕާނަށް 8.0ގެ ބާރުގަދަ ބިންހެލުމެއް އައިސް ބޮޑެތި ގެއްލުންތަކެއް ލިބުނެވެ. ޖަޕާނަކީ އެގައުމު އޮންނަ ޖޯގްރަފިކަލް ތަނުގެ ގޮތުން އަބަދުވެސް ބާރުގަދަ ބިންހެލުންތަކާއި ސުނާމީތަކާއި ކުރިމަތިލާންޖެހޭ ޤަައުމެކެވެ.